Galicia, entre as autonomías con máis pobreza enerxética
Un estudo da Universidade do País Vasco sitúa o noso país como unha excepción no norte de España, con índices de pobreza enerxética similares aos das rexións do sur.
Por Galicia Confidencial | Santiago de Compostela | 05/01/2018 | Actualizada ás 14:00
Galicia é, xunto coa zona sur de España, a rexión con máis pobreza enerxética no Estado. Así o conclúe un estudo realizado por dúas investigadoras da Universidade do País Vasco, do Departamento de Matemática Aplicada e do Departamento de Organización de Empresas. Os resultados da investigación poñen de manifesto que a pobreza enerxética en España aumentou entre os anos 2004 e 2015.
Os datos do estudo, titulado 'Counting energy poverty in Spain between 2004 and 2015', publícanse na revista científica Energy Policy. As súas autoras, Oihana Aristondo e Eneritz Onaindia, mediron a pobreza enerxética por rexións en España entre 2004 e 2015, usando tres indicadores de accesibilidade enerxética: a capacidade de manter o fogar adecuadamente quente, os atrasos nas facturas de servizos públicos (electricidade, auga, gas) e a presenza dun teito con pingueiras, paredes húmidas ou xanelas podrecidas.
Os resultados indican que a pobreza enerxética en España empeorou entre 2004 e 2015. Especificamente, as áreas rurais e as rexións do sur mostran os valores máis altos de pobreza enerxética, xunto con Galicia.
"Podemos pensar que como as rexións do sur son as máis cálidas, deberían sufrir menos pobreza enerxética. Con todo, este resultado pode ser unha consecuencia da pobre eficiencia e a falta de sistemas de calefacción adecuados no inventario de vivendas destas rexións", explican as autoras, que estiman que "as rexións máis frías son máis conscientes da importancia do mantemento do seu fogar relacionado coa electricidade e a calefacción":
GALICIA, UNHA EXCEPCIÓN NO NORTE
Con todo, Galicia é unha excepción. Nos mapas rexión por rexión elaborados polas investigadoras obsérvase que as comunidades autónomas enerxéticamente máis pobres en 2004 eran Galicia, no noroeste, e Murcia no sueste. Dúas rexións en polos opostos e con climas completamente diferentes.
Entre 2004 e 2015 Galicia deixou de ser a autonomía con máis pobreza enerxética xunto con Murcia. Con todo, mantívose entre as comunidades cos peores resultados, tanto no mapa de 2010 como no de 2015, canda as rexións do sur de España. De feito, a situación da pobreza enerxética de Galicia contrasta coa situación de todas as comunidades do norte e máis Madrid, que mostran sempre valores de pobreza enerxética máis baixos cós galegos.
Hai que lembrar que o informe do Valedor do Pobo de 2016 situaba nun 15,4% os fogares galegos en pobreza enerxética.
No mapa de 2010, Murcia, Andalucía e Estremadura son as que rexistran os peores valores. Mentres que no último mapa elaborado polas investigadoras, correspondente a 2015, obsérvase que son Castela A Mancha e as Illas Canarias as comunidades máis afectadas pola pobreza enerxética.
A nivel global, a porcentaxe de persoas pobres diminuíu entre 2004 e 2008, ano no que comezou a crise económica. Nos seguintes anos, esa tendencia mudou e a pobreza enerxética aumentou ata acadar un valor máximo en 2014 dun 11,03% de persoas pobres, segundo os resultados deste estudo.
Os datos mostran tamén que nas áreas intermedias e escasamente poboadas a pobreza enerxética é máis alta que nas densamente poboadas, de 2004 a 2007. Pero isto cambiou en 2008 cando se acadou o valor mínimo de pobreza enerxética e a porcentaxe de xente pobre en áreas densamente poboadas era un pouco máis alto. Entre 2009 e 2015 a tendencia mudou novamente e nas zonas intermedias e escasamente poboadas a porcentaxe de xente pobre volveu ser maior que nas áreas densamente poboadas, coa excepción de 2013.
