Por Galicia Confidencial | Pontevedra | 05/01/2018 | Actualizada ás 17:28
Moribundo e aprisionado. Así atopou a Garda Civil un cabalo en Barro tras unha alerta no 062. O seu dono, un mozo de 26 anos que o tiña en avanzado estado de desnutrición e en condicións precarias nun cortello, está a ser investigado por un delito de maltrato animal.
O instituto armado, a través do Seprona, recibiu unha alerta a través do teléfono na que se informaba das críticas circunstancias nas que se atopaba o equino. O animal estaba nunhas deplorables condicións hixiénico-sanitarias nun galpón en ruínas contiguo á vivenda do seu propietario no concello de Barro.
O cabalo estaba semienterrado no seu propio esterco e coas patas dianteiras aprisionadas entre o muro que facía de peche e un dos postes do enreixado da cuadra.
Coa axuda de varios veciños, os axentes lograron rescatar o animal e procuráronlle as primeiras atencións ata a chegada dunha veterinaria que, finalmente, decidiu sacrificalo para evitarlle o sufrimento que estaba a pasar.
O propietario do cabalo, A.G.A, un mozo de 26 anos veciño de Barro, recibiu xa a notificación de investigado e deberá comparecer no xulgado de instrución de garda de Pontevedra.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.