Mantense a alerta pola presenza duns 40 contedores á deriva fronte a costa galega
O buque 'MSC Eloane' perdeu parte da súa carga a unhas 40 millas da costa galega o pasado venres.
Por E.P. | A CORUÑA | 08/01/2018 | Actualizada ás 11:52
Salvamento Marítimo mantén a alerta a embarcacións e navegantes polos riscos que podería levar para a navegación a presenza duns contedores á deriva fronte á costa galega, segundo informou un portavoz deste departamento.
O portacontedores 'MSC Eloane' deu aviso na noite do venres da perda desta carga, cando se atopaba próximo ao dispositivo de separación do tráfico de Fisterra. Trátase de entre 30 e 45 contedores que se se caeron por un golpe de mar, pero que non conteñen "mercadoría perigosa", precisaron desde Salvamento Marítimo.
Polo momento, non se localizou ningún dos contedores, aínda que se fixo unha simulación sobre a deriva que poderían levar. Tamén se mobilizou ao avión 'Sasemar 102', aínda que sen ningún resultado por agora.
Por parte de Salvamento Marítimo encargáronse de alertar a embarcacións e navegantes para que extremen as precaucións xa que os colectores, dun tamaño de 40 pés, "poden supor un perigo para a navegación", subliñaron.
