'O Chicle' aférrase á versión do atropelo fortuíto no caso Diana Quer

José Enrique Abuín Gey, alias 'O Chicle', reiterou este luns ante a súa defensa que a morte de Diana Quer se produciu por un atropelo fortuíto e que non houbo agresión sexual. A falta do informe da autopsia, que se coñecerá nos próximos días, o seu letrado pediu unha pericial psicolóxica que determine a imputabilidade do detido.

Así o dixo o seu avogado, Ramón Sierra, á saída do cárcere de Teixeiro, onde Abuín Gey se atopa en prisión provisional e onde este luns mantivo un encontro de dúas horas con el, o primeiro desde que o venres concluíu o período de prisión incomunicada. O avogado do 'Chicle' chegou ao cárcere de Teixeiro ao fío das 17,30 horas sen facer declaracións, aínda que á saída si se parou cos medios.

No seu encontro, 'O Chicle' mantivo "exactamente" a súa versión na parte que "interesa" á súa defensa, reafirmando que "non houbo ningún compoñente sexual" no sucedido, nin no caso de Diana Quer nin no da moza do día de Nadal.

"Iso a nós mantennos na liña de estar á espera do informe preliminar da autopsia", dixo Sierra, en referencia á posibilidade de deixar o exercicio da defensa de Enrique Abuín no caso de que se confirme que houbo unha agresión sexual.

'O Chicle' reiterou ao seu avogado que o que se produciu o 22 de agosto de 2016 foi un "atropelo fortuíto", unha versión á que fixo "matizacións" aínda que sen cambiar a esencia. En todo caso, negou que recoñecese en ningún momento tela estrangulado, algo que o propio letrado, que o acompañou a noite do rexistro na nave industrial de Asados, tampouco escoitou.

Aínda que o letrado é tallante no caso da agresión sexual, no caso de que a autopsia descarte que Abuín Gey atropelase a Diana Quer, o avogado recoñeceu que "sería unha contradición e habería que valoralo", aínda que non asegurou que, nese caso, vaia deixar a defensa.

"BASTANTE DEPRIMIDO"

Ramón Sierra viu este luns ao seu cliente "bastante deprimido" e "bastante baixo". 'O Chicle', que aínda non falou coa súa muller desde a súa detención, preguntou ao letrado pola súa familia.

O avogado, que confía en que o informe da autopsia estea "esta semana", prevé visitar o seu cliente ao longo dos próximos días, antes de que se practique o rexistro previsto na nave de Asados onde se localizou o cadáver.

Finalmente, Ramón Sierra dixo descoñecer se Instituciones Penitenciarias podería cambiar a Abuín Gey de cárcere e confirmou que este mesmo luns pediu unha pericial psiquiátrica.

Unha das incógnitas aínda por despexar para definir o futuro da defensa son os resultados do segundo informe da autopsia practicada ao cadáver. Este informe deberá despexar a causa da morte de Diana Quer, así como determinar se se produciu agresión sexual.

O letrado do 'Chicle', ante quen sempre sostivo que a morte se produciu de forma accidental, avanzou en varias ocasións a súa intención de deixar a defensa de Abuín Gey no caso de que o informe da autopsia revele unha agresión sexual ou que a causa da morte sexa incompatible co que lle trasladou o seu defendido.

Aínda que, en principio, o letrado contaba con dispor xa para esta tarde do informe, finalmente non foi aínda trasladado ás partes, algo que, previsiblemente, se producirá nos próximos días.

OUTRAS CONDENAS

Con condenas anteriores por outros feitos delituosos, en 2015, a Audiencia Provincial da Coruña condenou a José Enrique Abuín Gey a dous anos e seis meses de prisión por un delito contra a saúde pública. Fíxoo após un operativo antidroga, autorizado por un xulgado de instrución de Ferrol e que levou a cabo en 2007. Como resultado do mesmo, xulgouse a unha decena de persoas.

En concreto, segundo recolle o fallo, ao que tivo acceso Europa Press, dous dos acusados desprazáronse até a provincia de Valladolid para recoller 608 gramos de cocaína que trouxeron a Galicia. Con todo, á altura do termo municipal de Guitiriz (Lugo), en xuño de 2007, foron interceptados por efectivos da Garda Civil.

Como resultado desta operación detívose, entre outros acusados, a José Enrique Abuín Gey. A el e a outro procesado incautáronselles diversas cantidades de cocaína, cun valor no mercado de 706.429 euros. Sobre esta droga, Abuín asegurou que non sabía o que contiñan as bolsas intervidas e que llas deu un tío seu para que llas gardase.