Chega un novo temporal este mércores mentres a neve dificulta as comunicacións en Lugo e Ourense
A forte nevada deste martes provocou importantes incidencias en vías da montaña de Ourense e Lugo.
Por E.P. | SANTIAGO DE COMPOSTELA | 09/01/2018 | Actualizada ás 16:34
A Dirección Xeral de Emerxencias e Interior decretou unha alerta de nivel laranxa en todo o litoral galego a partir do mércores por vento e ondas, cando aínda non remataron as alertas por neve en Galicia.
Baseándose en datos da Axencia Estatal de Meteoroloxía (Aemet), a Xunta avisou de que se esperan ventos de forza oito ou nove e ondas de entre cinco e sete metros. O temporal costeiro comezará na provincia da Coruña e estenderase posteriormente ás provincias de Lugo e Pontevedra, e espéranse refachos de vento de até 100 quilómetros por hora.
É por iso que o Goberno galego emitiu un comunicado para lembrar a importancia de non aproximarse á costa para previr un eventual golpe de mar. Esta alerta no litoral comunicada pola Xunta súmase a outra de nivel amarelo por neve nas zonas de montaña das provincias de Lugo e Ourense.
Neve
Un temporal que entra cando hai alerta por fortes nevadas nas zonas de montaña de Lugo e Ourense que este martes dificultan a circulación en varias estradas e provocaron incidencias puntuais nas vías.
A Dirección Xeral de Tráfico (DXT) recolle na súa páxina web varios avisos e constata, por exemplo, que a circulación está condicionada pola neve na A-52, desde o quilómetro 140 na Gudiña ao quilómetro 113 na Mezquita, en ambos os sentidos. Este tramo da A-52, segundo a DXT, é transitable con precaución, aínda que estivo cortada para vehículos que non leven cadeas ou pneumáticos de inverno. Tamén en Ourense hai un corte total en ambos os sentidos na estrada provincial OU-0807, no quilómetro 7,3 en San Vicente de Leira.
Do mesmo xeito, na estrada LU-633, á altura de Pedrafita do Cebreiro, desde o quilómetro 0 ao quilómetro 17, a circulación está condicionada en ambos os sentidos por mor da nevada. Pola meteoroloxía adversa, esta vez por ventos, a DXT informa de circulación irregular na A-8, á altura de Mondoñedo (Lugo), en ambos os sentidos desde o quilómetro 536 ao quilómetro 552. Finalmente, hai retencións por un accidente rexistrado na N-634, á altura de Cruz do Lobo, en Lugo.
