Un cento de integrantes do Exército Ruso estarán en Santiago e Pontevedra
Será o 18 e 19 de xaneiro dentro dunha xira do coro, ballet e orquestra deste exército.
Por Galicia Confidencial | Pontevedra | 09/01/2018 | Actualizada ás 22:10
O Exército Ruso en todo o seu esplendor “musical” chega a Galicia. Afundación, a Obra Social de ABANCA, acolle as representacións do Exército Ruso de San Petersburgo, conformado por coro, orquestra e ballet, nas cidades de Santiago de Compostela e Pontevedra.
Avalados polo éxito das súas xiras internacionais, o Exército Ruso de San Petersburgo chega a Galicia cun espectáculo no que interpretarán algúns dos temas máis coñecidos do folclore ruso, acompañados de traballadas coreografías e un destacado vestiario. Máis de 30 millóns de persoas en todo o mundo xa gozaron cas súas voces, os seus bailes e a súa música.
Os máis de 100 artistas que o conforman este espectáculo sairán a escena o vindeiro 18 de xaneiro, ás 20.30 horas, no Auditorio ABANCA de Santiago de Compostela e o 19 de xaneiro, a partir das 20.30 horas, na Sede de Afundación de Pontevedra. As entradas para ambos os dous espectáculos pódense adquirir na web Ataquilla.com.
