A contaminación tralos incendios "non terminou para nada"

A contaminación tralos incendios forestais do pasado outubro, que queimaron case 50.000 hectáreas en Galicia, "non terminou para nada". Advírteo a asociación Amigas das Árbores, que este xoves denunciou, ademais, que unha turbeira que ardeu a mediados da pasada primavera en Xinzo de Limia (Ourense) segue facéndoo a estas alturas.

Un dos portavoces desta asociación ecoloxista, Xosé Santos, explicou que, con todo, os arrastres ocasionados polas últimas choivas "non son tan fortes" como as que provocaron as primeiras precipitacións, debido a que aquelas afectaron a capa máis superficial do chan, e "a terra vai asentando", co cal resiste mellor.

Así, despois de constatar riadas de cinzas en zonas de montaña de Ourense, este axente forestal indica que agora a erosión leva por diante terra e barro, tamén cinzas, pero os ríos non baixan "tan negros como hai un mes".

"Os arrastres non paran de súpeto. Nin de aquí a un mes nin dous. Non coa forza do principio, pero seguirán. E sería necesaria unha actuación que a Xunta non está a facer", avisa este membro da asociación ecoloxista.

Respecto diso, alerta dos efectos para a fauna piscícola, xa que toda a materia arrastrada termina nos ríos e afecta a calidade da auga.

UN ARRASTRE EN BAIONA

Con todo, mariscadores consultados por Europa Press como o patrón maior da confraría de Redondela (Pontevedra), Clemente Bastos, celebran que "por sorte" non notaron "nada" nos bancos: "ningunha mortalidade".

Noutro dos municipios costeiros que sufriu a vaga de incendios, a concelleira de medio ambiente de Baiona, María Iglesias, sinala que o único arrastre que deberon afrontar nesta localidade se produciu o pasado 31 de decembro.

Este arrastre deuse no barrio da Anunciada e San Antón, segundo explica a concelleira, que engade que as cinzas "non chegaron ao mar" polo que non implicaron "ningún problema" para a pesca e para o marisqueo.

Si houbo que limpar cunetas e sumidoiros que se atascaron. "Este arrastre debeuse a que por enriba hai leiras privadas e non se tomaron as medidas correspondentes", afirmou a responsable.

LUME DE SUBSOLO

Por outra banda, Amigas das Árbores denunciou este xoves que una das turbeiras que existen preto das aldeas da Pena e Trandeiras (Xinzo de Limia) seguía ardendo esta fin de semana, despois de sufrir un incendio a mediados da primavera pasada.

En concreto, este terreo "moi virxe", no que se dá acumulación vexetal e de materia orgánica, sitúao na Lagoa de Antela, e explica que o lume neste punto queimou árbores que forman cortaventos.

O colectivo lamenta que non se desenvolvesen actuacións para apagar o lume de subsolo mediante a utilización de retroescavadoras, e chama a atención sobre a perda do "efecto esponxa" destes espazos, "que se empapan de auga" e logo son "vitais para regular o ciclo da auga".