Por E.P. | PONTEVEDRA | 13/01/2018 | Actualizada ás 11:58
O fundador de Anova e dirixente nacionalista Xosé Manuel Beiras advertiu a Podemos que a "esquerda emerxente" pola que a cidadanía "apostou e votou esperanzada" —tamén no caso de En Marea— pode acabar en "mal porto" se Podemos "se preocupa da demoscopia e de como os seus posicionamentos impactan no electorado español".
Logo da intención de Esquerda Unida de demandar máis peso na alianza estatal argumentando un "desgaste" por parte de Podemos, Beiras sinalou que se trata de "cuestións internas" do espazo político que representa Unidos Podemos.
Con motivo da súa estancia en Pontevedra no marco dunha conferencia organizada por Anova a última hora deste venres, avisou que "mal servizo fan se se enredasen en se lle corresponde máis ou menos a uns e a outros", o que afectaría tanto a ambas as formacións como ás confluencias xurdidas en Galicia e Cataluña.
EN MAREA
No caso de Galicia, "hai que ver en que medida se consolida En Marea como alternativa de unidade popular", precisou o fundador de Anova en declaracións a Europa Press. Xosé Manuel Beiras instou a respectar os documentos fundacionais do partido instrumental e da coalición creada para as eleccións de 2015 porque, avisou, en caso encontrario "estase formalmente dentro de En Marea pero en realidade estase fóra".
Tamén fixo un chamamento a "traballar coa visión posta no norte, como os mariñeiros", atribuíndo os "bandazos" ao "vento en contra", o que obrigaría a variar o rumbo para alcanzar o obxectivo. En cambio, "sería un desastre para a cidadanía se non se ten en conta o norte e pérdese nas guiñadas", prognosticou.
"Non se pode estar nunha organización que é un partido instrumental", indicou, referíndose a En Marea, "cunha concepción onde o protagonismo é dos cidadáns e non das forzas políticas, e ao mesmo tempo dicir que se quere estar fóra ou ir pola súa conta", recalcou Xosé Manuel Beiras, argumentando que "sería unha fraude ao proxecto de En Marea e aos cidadáns", concluíu.
Estas declaracións do histórico dirixente nacionalista coinciden coa celebración este sábado do Consello Cidadán Estatal de Podemos, na que Pablo Iglesias prevé presentar a súa estratexia para 2018.
CATALUÑA
O fundador de Anova tamén aproveitou para atribuír a reacción de independentistas cataláns como o ex-vicepresidente Oriol Junqueras, o exlíder da ANC, Jordi Sánchez, e o responsable de Òmnium Cultural, Jordi Cuixart, ante os procesos xudiciais polos que están a ser investigados, á "chantaxe sistemática" do Estado, polo que "teñen que ver como poden saír ao paso".
Beiras sinalou que esta situación "dá lugar a que reiteren que están dispostos a dialogar", algo que "xa dixeron durante o procès" e que até o momento "non houbo". O dirixente de Anova acusou ao Goberno do Estado de facer un "uso do poder autoritario, propio do fascismo, do nazismo e do franquismo, fronte a cidadáns indefensos e forzas democráticas coas mans atadas".
En declaracións a Europa Press, Beiras cualificou de "inxustas e ilegais" as últimas eleccións convocadas desde a Administración Central despois de converter Cataluña nun "país ocupado", onde se "cancelaron" as institucións do Parlamento e a Generalitat e fíxose unha aplicación "espúrea" do artigo 155 da Constitución, "como sinalan todos os especialistas", insistiu.
Ademais, reprochou a acción dos medios de comunicación "do pensamento único", dos que afirmou que exercen de "repetidores das mensaxes perversas que dita o Goberno do Estado" á mantenta de trasladar que os independentistan "tentan colaborar, dando unha imaxe de que se baixan os calzóns". Para Beiras, esta situación que sería "imposible en calquera país democrático", prodúcese nunha Europa que puxo á altura dun "Cuarto Reich", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.