SANTIAGO DE COMPOSTELA | 16/01/2018 | Actualizada ás 15:09 por EUROPA PRESS
Sindicatos acusaron este martes ao vicepresidente da Xunta, Alfonso Rueda, de "mentir" ante o conflito aberto en relación aos funcionarios de Xustiza, e denunciaron que, a pesar de que inicialmente "se comprometeu para o xoves pasado e xa se aprazou", aínda non hai data para a reunión na que deberían seguir as negociacións encamiñadas a evitar a folga prevista.
Nun comunicado, os sindicatos lembran que Rueda destacou "avances" entre o comité de folga e a Dirección Xeral de Xustiza, ademais de avanzar "unha mellora substancial", pero lamentan que "o único que hai son mentiras" ás que "agora hai que engadir o desprezo" ao comité de folga e ao Consello de Relacións Laborais, que exerce de mediador.
"As boas sensacións da reunión do pasado día 9 disipáronse e volven polo camiño da non negociación e da irresponsabilidade", sinala o comité de folga, que subliña que para este martes estaba prevista a sexta reunión coa Xunta, coa mediación da presidenta do Consello de Relacións Laborais, "que xa for a aprazada o xoves pasado".
"A reunión, sen previo aviso e sen ningunha explicación por parte da Xunta, non tivo lugar. Agora mesmo non só non sabemos cando haberá unha nova reunión, se non que nin tan sequera temos claro se a haberá antes da folga do día 25", reflexionan.
Ante as "faltas de respecto" da Xunta e, sobre todo, o "distanciamento" nas propostas do comité e a Xunta, ratifican a presentación da comunicación de manifestación para o día 25 de xaneiro en Compostela, coincidindo co terceiro día de folga na xustiza galega.
Á manifestación están convocados os 2.500 traballadores da Administración de Xustiza en Galicia, remarcan os sindicatos, quen advirte que "os xuízos, actuacións xudiciais e declaracións que se suspendan" serán "responsabilidade unicamente" do conselleiro, que é quen "mantén discriminados aos traballadores galegos con respecto ao resto do Estado.
ALGÚN AVANCE, PERO DISTANCIA
Ademais da manifestación e da folga do 25, mantense viva a convocatoria de paro indefinido na xustiza galega para febreiro. E é que os traballadores galegos ven "discriminados" con respecto ao resto do Estado e lembran a Rueda que, desde o ano 2010, son "os que menos cobran mensualmente de todas as comunidades coas competencias transferidas".
Con respecto á "discriminación sanitaria", o comité de folga incide en que a Xunta "segue sen aceptar regular as incapacidades laborais" igual que os traballadores doutras comunidades, maxistrados, fiscais e letrados xudiciais.
No punto de consolidación de emprego, admiten que houbo "algún achegamento" e tamén no plan de amortización de 106 prazas que a Xunta aprobou en 2013 (sinalan que o Goberno galego aceptou paralizalo e recuperar as prazas que se amortizaron, salvo algunha excepción). "Pendentes dalgunha aclaración, e sobre todo dos prazos para recuperar estas prazas, neste punto o acordo está máis próximo", indican.
Con todo, no único extremo que os sindicatos recoñecen "un acordo absoluto" é no que incumbe a que os traballadores que fagan o seu traballo noutro posto de superior categoría cobren "o cento por cento das retribucións" do posto no que desempeña as súas funcións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.