SANTIAGO DE COMPOSTELA | 20/01/2018 | Actualizada ás 16:21 por EUROPA PRESS
'Matria', a curtametraxe que trata de visibilizar o "falso mito" do matriarcado en Galicia, dirixido polo galego Álvaro Gago, exhíbese desde este sábado no Festival de Sundance 2018 (principal festival de cinema independente dos Estados Unidos).
O filme narra en vinte minutos un día na vida de Ramona, unha muller que apenas se comunica co seu marido e que traballa nunha fábrica de conservas. Ante os desafíos que lle presenta a súa rutina diaria, Ramona trata de refuxiarse na relación que lle une coa súa filla e a súa neta para saír adiante.
En concreto, 'Matria' --producida por Sombriza Films en coprodución con Ringo Media, distribuída por Marvin&Wayne e apoiada por Agadic-- terá catro pases no festival este sábado, luns, martes e xoves.
O filme esta protagonizada por Francisca Iglesias Bouzón e conta cun elenco conformado por actrices e actores sen experiencia previa.
ARGUMENTO E MENSAXE DA CURTAMETRAXE
'Matria' narra "un día rutineiro na vida de Ramona, unha muller que traballa nunha fábrica de conservas", tal e como manifestou o seu director, Álvaro Gago. O cineasta revelou a Europa Press que "o diferente ese día que se conta na película é que a súa neta está de aniversario" e "Ramona ten que arranxarse para chegar a darlle un agasallo". É aí cando "xorden os obstáculos da súa rutina que lle impiden seguir adiante".
Álvaro Gago asegurou que "nun inicio, a curta non estaba politicamente orientada" e que "ese sentimento de compromiso coa muller foi xurdindo aos poucos". A finalidade do director era "transmitir a historia dunha muller que foi importante" na súa mocidade.
Con todo, a medida que se rodaban as escenas, Gago explicou que "se foi orientando cara a ese obxectivo final" que persegue a obra: "desmentir o falso mito do matriarcado en Galicia". O cineasta apuntou que este "é un deses mitos que desde pequeniños inculcan aos nenos", a pesar de "non ser verdade".
O filme trata de "visibilizar esta cuestión" e "pór o punto sobre o matriarcado", para tratar de demostrar que "non existe en realidade o concepto de matriarcado tal e como o queren contar", asegura.
A título persoal, o director comentou que tenta "participar con todo o que podo na visibilización da muller", para "loitar pola igualdade", que para el é sinónimo de "futuro". Así, mantense fiel á súa premisa de que "o cinema ten que ter unha vertente comprometida coa realidade que retrata".
ELENCO DE ACTORES
'Matria' conta cunha repartición integrada por actrices sen previa experiencia. A actriz principal, Francisca Iglesias Bouzón, é coñecida por Álvaro Gago desde que este era un neno. Por iso, para o director supuxo unha verdadeira inspiración, até o punto de que "é dela de onde xorde o interese por crear esta historia", porque Gago tiña esa "curiosidade pola persona que había detrás de Francisca".
A protagonista de 'Matria' coidaba ao seu avó ata que faleceu e por ese motivo, tal e como sinalou Gago, compartiron "moito tempo xuntos" e fortaleceron "unha gran amizade". Na curtametraxe tamén actúan a irmá e a sobriña de Francisca.
O resto do elenco está formado por mulleres que xa traballaban na fábrica de conservas onde se realizou a rodaxe, todas elas das zonas de Cambados, Vilanova e Illa de Arousa. Gago incidiu así en que "o elenco non se dedica ao mundo do cinema profesionalmente".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.