SANTIAGO DE COMPOSTELA | 20/01/2018 | Actualizada ás 19:48 por EUROPA PRESS
O portavoz de En Marea, Luís Villares, reclamou á Xunta que volva á mesa de negociación cos traballadores de Xustiza, á vez que acusou ao vicepresidente autonómico, Alfonso Rueda, de estar "máis interesado en encubrir os casos de corrupción que en pór os medios e recursos necesarios para loitar contra ela".
Así, segundo recolle un comunicado de En Marea, Villares tachou de "totalmente inaceptable" a ruptura das negociacións co comité de folga e ve "especialmente grave" que o Goberno galego non respecte a "posición unánime" do Parlamento galego de apoiar as demandas dos traballadores de Xustiza.
"É fundamental contar con bos medios persoais para a loita contra a corrupción e en xeral para mellorar as condicións da administración de Xustiza do noso país", continuou Villares.
Nesta liña, cargou contra Alfonso Rueda, ao que acusa de "ocuparse e preocuparse unicamente de tapar os casos de corrupción que en concellos como o de Valga están atenazando o seu partido".
"Unha vez máis este tipo de comportamentos deixa ao descuberto a verdadeira natureza do PP e a súa falta total de vontade para acabar coa corrupción", concluíu Villares.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.