Por Galicia Confidencial | A Coruña | 21/01/2018 | Actualizada ás 10:00
Ciudadanos Galicia decidiu romper unha especie de pacto de non agresión que tiña co PPdeG. E fíxoo logo de que o presidente da Xunta disparara primeiro contra eles.Por iso, non tardou nin un día en respostar ás palabras do presidente da Xunta que, por primeira vez, decidiu atacar duramente a esta formación política. "Ciudadanos ten 0 escanos en Galicia", suliñaba o líder popular ao lembrar que moitos dos seus cargos son "rebotados" doutros partidos. "Que Feijóo deixe de pensar en si mesmo e en Madrid e pense nos galegos", respondíalle a portavoz de C'S Galicia, Olga Louzao.
"Leva anos preparando a súa escalada a Madrid e, para iso, supeditou os intereses de Galicia aos intereses do seu partido, obrigando aos galegos a realizar esforzos extras para poder presentarse como salvador da crise económica”, espeteulle. Logo da celebración dun comité autonómico, criticou ao presidente galego porque dixo, “Galicia sofre a súa subordinación” e “carece de autocrítica do mesmo xeito que o PP”.
Así, aclaroulle que os cargos desta formación “non veñen de listas doutros partidos” porque "pensan en política a longo prazo". "A soberbia coa que o Sr Feijóo se refire á nosa formación indícanos que se está facendo un bo traballo e así continuaremos traballando, demostrando que chegamos para quedarnos”.
Ademais, a portavoz de Cs Galicia dixo que, se o AVE non chegou aínda a Galicia, “é pola falta de interese dos últimos gobernos de España" e da Xunta. Por iso pediu a Feijóo que "non enganen aos galegos”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.