As cinco persoas de confianza de Feijóo “que teñen un mérito de carallo”
O presidente da Xunta deu a coñecer o pasado sábado con nome e apelidos as persoas máis próximas e que o axudaron a chegar onde está.
Por Galicia Confidencial | Compostela | 23/01/2018 | Actualizada ás 08:30
Alberto Núñez Feijóo chegou á Presidencia da Xunta grazas a parte do aparato do seu partido, a respaldos mediaticos importantes e, sobre todo, ao apoio incondicional de determinados colaboradores. Algúns deles levan con el desde hai moitos anos, mesmo desde os seus inicios políticos.
Son eses apoios os que fan que Feijóo estea ao tanto do que acontece na Xunta e no seu partido e tamén os que diseñan os seus discursos e as estratexias políticas. Nunca fala deles, cando menos, públicamente, pero o outro día, despachouse a gusto e mesmo se emocionou nun discurso que sonou a despedida.
OS SEUS CINCO APOIOS
Foi durante a Xunta Directiva do seu partido. Alí, e rodeado dos principais dirixentes do PPdeG, doce anos depois de asumir o liderado do PPdeG, recoñeceu o tropezo das municipais e resaltou o papel dos seus antecesores, principalmente, de Manuel Fraga. Pero o seu gran recoñecemento foi para cinco persoas: Mar Sánchez, Álvaro Pérez, Lucas Martinón, Isabel Figueira e Marta Varela.
“Eu traballei só con cinco persoas máis directas que me tiveron que aturar todos os días e aínda seguen aturandome todos os días: Mar Sánchez, Álvaro López, Lucas Martinón, Isabel Figueira e Marta Varela. Todos os días. Iso si que ten mérito e como nunca o dixen e hoxe estamos de celebración me corresponde. Iso ten un mérito de carallo”, asegurou.
Os aludidos son Mar Sánchez, secretaria xeral de Medios e que leva con Feijóo desde a súa etapa en Correos, Álvaro Pérez; director xeral do Gabinete da presidencia; Lucas Martinón, director xeral de Comunicación; Isabel Figueira, secretaria técnica da Presidencia e Marta Varela, xefa de comunicación.
