Por Galicia Confidencial | Ourense | 22/01/2018 | Actualizada ás 13:30
A guerra entre C's e o PP en Galicia non fixo máis que comezar. Logo do resultado das eleccións catalanas e das enquisas que dan vantaxe á formación laranxa, as críticas do PP non se fixeron agardar. O propio Núñez Feijóo, a pesar de que Ciudadanos é residual en Galicia tamén cargou duramente este sábado contra esta formación e a contestación da súa coordiandora en Galicia non se fixo agardar cualificando de "soberbio" ao presidente galego.
Per os tirapuxas entre estes dous partidos continúan. Este luns, C's atacaba duramente o goberno de Ourense, a única gran cidade que goberna o PPdeG e na que non ten representación a formación laranxa. "Desde Ciudadanos consideramos moi grave o deixamento no que se atopa actualmente o Concello de Ourense facendo que decenas de instancias e mocións de diferentes colectivos tales como Asociacións Veciñais e doutra índole, do mesmo xeito que as enviadas por C's, nunca obteñan resposta", dixo o voceiro desta formación na cidade, Alberto Rodríguez.
“É evidente que se está máis preocupado por aparentar que por traballar realmente”, suliñou ao tempo que criticou que o concello non teña Orzamento, nin PXOM, nin execute as obras. “Realidades como o abandono das zonas verdes, a non renovación do contrato de buses ou que se perdan subvencións, non son opinións subxectivas, senón feitos que están a ocorrer na nosa cidade”, incidiu.
Ademais, criticou que o alcalde non teña aínda dado resposta ás propostas de Ciudadanos. Cómo é posible que a nosa formación que aínda non dispón de representación no Concello de Ourense estea a realizar un traballo para a mellora da nosa cidade e desde o Concello, de maneira sistemática, se óbvien todas as nosas propostas do mesmo xeito que as doutros colectivos?”, pregúntanse. Por iso, demandou que “se depuren” responsabilidades.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.