Xosé Manuel Barreiro: "O PP non terá problemas para substituír a Feijóo"

O portavoz do PP no Senado, Xosé Manuel Barreiro, manifestou que o partido non terá problemas para substituír a Alberto Núñez Feijóo, o actual presidente da Xunta, se non repite como candidato para as próximas eleccións autonómicas, e mostrouse convencido de que "o partido ten persoas con capacidade suficiente" para afrontar a substitución.

En entrevista á Cadena Ser recollida por Europa Press, Barreiro asegurou que do mesmo xeito que Feijoo puido relevar a Fraga, unha figura, ao seu xuízo, "irrepetible", Barreiro sostén que chegado o momento con Feijóo ocorrerá o mesmo.

"Eu non teño ningún tipo de dúbida que no momento no que Alberto Núñez decida que debe dedicarse a outro tipo de actividades, xa sexa noutro ámbito político, noutro ámbito xeográfico, etc., pois estou seguro que o partido aquí en Galicia vai ter persoas con capacidade suficiente e con experiencia acreditada tamén para poder continuar este labor que agora está a facer de forma tan brillante Alberto", aseverou.

Barreiro, que define a Feijóo como "o Fraga do momento", cre ademais que é prematuro afirmar que non volverá presentarse a un cuarto mandato e deixa caer que el foi o primeiro en dicir que Feijóo tiña que presentarse á terceira reelección.

Preguntado sobre Mariano Rajoy sinalou que é o principal activo do PP, capaz de sacar a España da crise e pono como modelo de recuperación en toda Europa e sostén que non hai razóns para que Rajoy non sexa o candidato conservador nas próximas eleccións xerais. Definiu o seu labor, incluída a xestión da crise catalá, como "intachable".

"VERGOÑA" POLA CORRUPCIÓN

En relación aos escándalos de corrupción que se produciron no PP, Barreiro admitiu que, do mesmo xeito que moitos militantes, sente vergoña por este tipo de prácticas, pero asegura que Rajoy adoptou as medidas necesarias para castigar esas prácticas en política.

"Efectivamente sentímonos avergoñados a inmensa maioría, os miles e miles de militantes do partido pola conduta que supostamente poidan cometer algunhas persoas", asegurou, pero matizando a continuación que "algunhas persoas que nestes momentos non están no Partido Popular".

Neste contexto, Barreiro sostén que as insinuacións de Pablo Crespo sobre as irregularidades no Partido Popular de Galicia e o cobro de diñeiro en B hai que atribuílas ao ámbito do seu defensa e pediu respecto aos tempos e aos modos da xustiza.

Precisamente, defendeu que o PP xa tivo pronunciamientos claros sobre a corrupción, realizados por Rajoy, e engadiu que se impulsaron case 70 medidas desde o executivo, en ocasións "en solitario", para loitar contra a corrupción.

Finalmente, Xosé Manuel Barreiro apelou á responsabilidade da oposición para a aprobación dos Orzamentos Xerais do Estado e cualificou de "hipócrita" a postura de Ciudadanos, un partido que mentres "presiona" coa investigación da senadora Pilar Barreiro ten as súas propias contas cuestionadas polo Tribunal de Contas. En todo caso, mostrou a súa confianza na aprobación dos PGE dentro do prazo estipulado.