Por E.P. | SANTIAGO DE COMPOSTELA | 30/01/2018 | Actualizada ás 17:26
A xunta de vicepresidentes da confederación de empresarios de Galicia (CEG) acordou que a institución celebre eleccións á presidencia o próximo 10 de maio. Este martes reuníronse o catro presidentes das confederacións provinciais, Antonio Fontenla (A Coruña), Jorge Cebreiros (Pontevedra), Jaime López (Lugo) e José Manuel Pérez Canal (Ourense), que conforman a xunta de vicepresidentes. Esta xunta configúrase como xestora cando o cargo de presidente está vacante, e á súa fronte sitúase a persoa de máis antigüidade no posto, que neste caso é Fontenla.
Así as cousas, os empresarios galegos elixirán dentro de cen días cal será o seu novo máximo representante, após a dimisión de Antón Arias a semana pasada, que é a terceira dun presidente da patronal en pouco máis de dous anos (após as marchas de José Manuel Fernández Alvariño e Antonio Dieter Moure).
Nun estado de permanente conflito, unha nova persona alzarase á fronte da entidade o próximo 10 de maio, após unha asemblea convocada ás 12.00 horas. Os candidatos, segundo establecen os estatutos, poderán presentarse até unha semana antes desa data.
Está por ver se durante as próximas semanas darán un paso á fronte varios aspirantes ou se o catro provincias acordarán un único candidato, como era a intención hai un ano, ata que se presentou Antón Arias.
CRISE DESDE 2013
Arias abandonou a CEG ao constatar que só puido levar adiante un dos seus dous obxectivos: a viabilidade económica da institución. O que non logrou foi a reforma dos estatutos, que precisamente expuña para evitar que se poidan dar situacións de bloqueo como as que veñen dando no seo da organización desde fai cinco anos (Alvariño chegou ao poder en 2013).
Neste escenario, seguen enfrontados varios sectores, con gran malestar nas confederacións de Pontevedra e Ourense polo mandato de Arias, a quen apoiaron no seu día tanto A Coruña como Lugo, e coa polémica sobre cal debe ser o papel das organizacións sectoriais no futuro da CEG.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.