Por Galicia Confidencial | Ames | 31/01/2018 | Actualizada ás 11:27
Numerosos veciños de Ames participaron este luns nunha xuntanza presidida polo alcalde para abordar a problemática do tráfico na N-550 ao seu paso pola avenida Rosalía de Castro. Esta estrada é unha das que soporta máis circulación da provincia da Coruña e divide á metade a localidade do Milladoiro, un dos lugares máis poboados deste concello.
En dito acto participaron os concelleiros e concelleiras dos sete grupos políticos con representación na corporación municipal e medio cento de veciños e veciñas do Milladoiro. Con esta xuntanza activouse un acordo alcanzado entre as sete forzas para dar resposta a esta situación.
Tras máis de dúas horas de reunión acordouse a creación dunha Plataforma veciñal pola humanización da avenida de Rosalía de Castro. Unha plataforma con presenza de representantes de distintas forzas políticas e na que se tratarán as iniciativas a levar a cabo no futur como mobilizacións, regulación semafórica, control de velocidade ou recollida de sinaturas.
IMPACTOS
Ademais, acordouse facer un estudio de impacto ambiental e acústico, incluír a construción dunha senda peonil ata Santiago de Compostela dentro das reivindicacións ao Ministerio de Fomento e analizar outras experiencias de cidades que xa pasaron por unha situación parecida
Por último, na xuntanza embrouse que a corporación municipal solicitou unha xuntanza co Ministro de Fomento, Íñigo de la Serna, e instouse á Xunta de Galicia e á conselleira de Infraestruturas para que medie entre as dúas administracións, o concello e o ministerio, na procura dunha solución o máis rápida posible.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.