Por Galicia Confidencial | Santiago de Compostela | 02/02/2018 | Actualizada ás 14:29
O Concello de Santiago creou unha comisión de traballo para avaliar o modelo de xestión do servizo de abastecemento de auga na capital galega. O actual contrato de prestación --adxudicado a Viaqua-- expira na primavera do ano que vén, coincidindo co fin do mandato, e o goberno local non agocha que a súa intención é estudar a xestión directa do servizo.
"A ninguén se lle escapa que hai esa intención", confesou este venres o alcalde, Martiño Noriega, que matizou a municipalización de servizos "é un tema complicado", como demostra a recuperación da xestión da ORA e o guindastre municipal, aprobada en pleno pero paralizada por procesos xudiciais.
Deste xeito, o Concello nomeou un grupo de traballo que encargará dúas auditorías; unha para avaliar a situación do contrato desde o punto de vista económico e outra orientada aos aspectos técnicos da prestación do servizo. Este último será elaborado por Emalcsa, empresa municipal de xestión da auga na Coruña.
O director da área de Espazos Cidadáns e Urbanismo, Ignacio Pechada, será o interventor nunha comisión que completan, en palabras de Noriega, persoas "de confianza" e con "demostrada solvencia técnica". Nela figuran os concelleiros Xan Duro e María Rozas, así como o xefe de gabinete do goberno local, Miguel Penas, e os responsables das áreas de contratación, obras, persoal e asesoría xurídica.
O obxectivo deste grupo de traballo é elaborar "unha foto fixa" do servizo de augas na capital galega para estudar "que modelo de xestión" é máis adecuado, aínda que o Goberno compostelán non esconde que aposta pola asunción directa do mesmo, como xa indicou en varias ocasións Noriega en liña cunha das promesas electorais de Compostela Aberta en 2015: a municipalización de servizos.
EXPERIENCIA EN TEO
A recuperación para xestión directa da rede de abastecemento de augas non é algo alleo ao alcalde santiagués, quen, na súa etapa como rexedor de Teo (A Coruña), xa levou a cabo un proceso similar que desenvocou na municipalización do servizo en novembro de 2015, xa con Noriega fóra do consistorio logo de apostar por encabezar a candidatura de Compostela Aberta en maio dese mesmo ano.
Martiño Noriega recoñece que a municipalización de servizos é "un tema complicado", aínda que supón "un reto" que, ademais, coincidirá no tempo co fin do actual mandato municipal e a cita coas urnas nas que Compostela Aberta aspirará a renovar o seu goberno.
Así, instou a "enfocar con rigor" un proceso no que o consistorio compostelán ten depositado "moito interese", xa que supón unha oportunidade para xestionar doutra forma "un recurso ambiental" como a auga, que, ante as incidencias do "cambio climático", cobrará maior importancia nos próximos anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.