As Illas Atlánticas serán o sexto humidal galego protexido pola súa importancia internacional
A Xunta tramitou ante o Goberno central a súa inclusión na listaxe do Convenio Ramsar.
Por E.P. | SANTIAGO DE COMPOSTELA | 03/02/2018 | Actualizada ás 14:59
A Consellería de Medio Ambiente e Ordenación do Territorio tramitou ante o Goberno central a inclusión do Parque Nacional Marítimo-Terrestre das Illas Atlánticas de Galicia na listaxe de humidais de importancia internacional, co que se sumaría aos cinco espazos galegos que xa contan con esta declaración. Así o anunciou este sábado a directora xeral de Patrimonio Natural, Ana María Díaz, durante a inauguración dunha xornada en Sada (A Coruña) para celebrar o Día Mundial dos Humidais, na Reserva da Biosfera Mariñas Coruñesas e Terras do Mandeo.
O seguinte paso será que o Consello de Ministros dite o acordo da inclusión no Convenio Ramsar polo que, Galicia contará en breve cun sexto humidal protexido, o das Illas Atlánticas, formadas polas Illas Cíes, Sálvora, Ons e Cortegada.
Galicia xa conta na actualidade con cinco espazos declarados como humidais de importancia internacional, que suman en total 7.698 hectáreas: a ría de Ribadeo; a ría de Ortigueira-Ladrido; a lagoa e areal de Valdoviño; o complexo das praias, lagoa e duna de Corrubedo e o complexo intermareal Umia-O Grove, A Lanzada, Punta Carreirón e Lagoa Bodeira.
En todo caso, a Xunta de Galicia lembra que no país hai identificados máis de 1.000 humidais repartidos de forma maioritaria entre os sectores litorais, as depresións sedimentarias interiores e as áreas de montaña sublitorales e centrais.
Por provincias, Lugo sitúase á cabeza ao concentrar o 30% de todos os humidais que están inventariados en Galicia, e o 60,6% da superficie que ocupan. Detrás dela está a provincia da Coruña, cunha porcentaxe de zonas húmidas moi similar (o 29,7%), pero cunha extensión moito menor, que representa o 46,8% do total.
As provincias de Pontevedra e Ourense albergan un menor número destes ecosistemas, con 236 humidais e 8.088,7 hectáreas, e 218 e 9.663,6 hectáreas, respectivamente.
O Día Mundial dos Humidais celébrase cada 2 de febreiro desde 1971. Conmemórase así a data da firma do Convenio sobre humidais na cidade iraniana de Ramsar, para crear conciencia en todo o mundo dos valores que achegan este tipo de ecosistemas para o planeta.
O lema escollido neste 2018 foi 'Humidais para un futuro urbano sustentable', seleccionado co fin de pór de manifesto a importancia de preservar, nun estado saudable, os humidais situados en contornas urbanas.
