Condenan ao Sergas a indemnizar á familia dunha muller que faleceu polo atraso no diagnóstico dunha infección

Un Xulgado do Contencioso de Santiago de Compostela condenou ao Sergas polo atraso no CHUAC en 2012 no diagnóstico dunha infección nosocomial, con resultado de falecemento, a unha muller de 74 anos, veciña de Ferrol, que fora transplantada de ril.

A Asociación 'O defensor do paciente' informou da sentenza, tramitada polos Servizos Xurídicos do colectivo en Galicia, que condena ao Sergas a indemnizar, polos danos e prexuízos ocasionados, á filla da falecida.

A muller, P.C.A., de 74 anos de idade e veciña de Ferrol (A Coruña), padecía insuficiencia renal crónica en estadio V e realizaba Programa de Hemodiálisis no Hospital Juan Cardona de Ferrol desde facía dous anos e medio. Ademais, estaba incluída en lista de espera para un transplante de ril no Complexo Hospitalario Universitario da Coruña, que se realizou en decembro de 2011.

A Asociación informa que o 23 de xaneiro de 2012, a pesar de que a paciente viña "sufrindo un cadro de dificultade e insuficiencia respiratoria con hipotensión arterial duns 15 días de evolución", "a única medida que tomou o Servizo de Nefrología do CHUAC foi a administración dunha máscara de osíxeno, sen realizar as probas diagnósticas adecuadas encamiñadas a determinar a causa da disnea que presentaba a paciente (tan só se lle realizou á paciente unha radiografía de tórax o 13 de xaneiro, a cal non resulta suficiente)".

A entidade explica que "debería realizarse un TAC para confirmar o diagnóstico, o que non se fixo ata que a paciente ingresou na UCI". Así, "a paciente permaneceu máis de 15 días con máscara de osíxeno, sen que se lle realizasen as probas diagnósticas adecuadas no tempo adecuado".

A sentenza acolle os argumentos do avogado Cipriano Castreje, da Asociación 'O Defensor do Paciente', en base ao informe pericial dun especialista en medicina interna, que sinalou que o Sergas non actuou conforme á 'lex artis', producíndose "un atraso diagnóstico evidente ante unha patoloxía potencialmente letal, con sintomatología clara de bronconeumonía, non utilizándose o arsenal terapéutico posible nun hospital de terceiro nivel".

Nesta liña, indícase que "a infección nosocomial non diagnosticada nin tratada" foi "a que produciu o falecemento" e que se a paciente fose tratada coa terapia adecuada e "no tempo adecuado, curaríase", indicando que "este tipo de enfermos son máis propensos a coller infeccións que deben ser tratadas tempranamente e dunha maneira máis exhaustiva, xa que a bacteria que tiña a paciente era letal se non lla trataba".

Agora, o Xulgado Contencioso dá a razón á filla e condena ao SERGAS a indemnizala nunha suma, máis os intereses, que a filla da falecida considera "razoable", sinalando que "o máis relevante é que o Xulgado lle devolveu a dignidade a pesar do falecemento da súa nai", posto que non lle fixeron "ningún caso" no servizo no que estaba ingresada a pesar das "queixas reiteradas".

O avogado Cipriano Castreje lembra que basta con acudir ao servizo de Atención ao Paciente para facer constar por escrito as queixas, posto que, en caso contrario, "é moi difícil demostralas nun hipotético proceso posterior", porque "aínda que non sexa moi relevante para gañalo, si o é para que conste que non se está de acordo coa atención médica ou mesmo co trato recibido".