Por E.P. | SANTIAGO DE COMPOSTELA | 05/02/2018 | Actualizada ás 17:21
A Consellería de Cultura, Educación e Ordenación Universitaria iniciou o procedemento para a declaración como Ben de Interese Cultural (BIC) das nove esculturas do arquitecto Mestre Mateo procedentes da desaparecida fachada occidental da Catedral de Santiago. Dous delas, a dos profetas Abraham e Isaac, atópanse en posesión da familia Franco.
A Xunta, segundo indica nun comunicado, publicou este luns a resolución no Diario Oficial de Galicia (DOG), de modo que o expediente da declaración deberá resolverse no prazo máximo de 24 meses. Na resolución, o Goberno galego expón que este nove pezas teñen "o valor suficiente para ser declaradas BIC" polo seu "patrimonio cultural, o seu significado, a súa procedencia e a xenialidade do seu autor".
Estas nove pezas e figuras románicas, segundo explicou a Xunta, teñen unha cronoloxía comprendida entre os anos 1188 e 1211. Na actualidade, atópanse tanto en mans particulares como custodiadas en institucións públicas como o Museo da Catedral de Santiago ou o Museo de Pontevedra.
Neste sentido, a Xunta lembrou que a declaración dun ben como BIC é un recoñecemento de valor cultural "que non afecta á súa titularidade" pero cuxos propietarios teñen "o deber de habilitar un mínimo de catro días de visita ao mes".
PROPIEDADE "IRREGULAR OU ILEGAL"
En novembro, o Concello de Santiago denunciou pola vía civil á filla do ditador Francisco Franco, Carmen Franco, pola propiedade "irregular ou ilegal", en palabras do rexedor da capital galega, Martiño Noriega, das estatuas de Abraham e Isaac do Mestre Mateo.
Ademais, o alcalde asegurou que o Consistorio incorporara "toda a documentación que demostra que o Concello é o lexítimo propietario das dúas pezas, adquiridas ao Conde de Ximonde en 1948".
Coa morte de Carmen Franco o pasado 29 de decembro, a demanda pasou a mans dos seus fillos. Neste sentido, Noriega apuntou que seguirían con esta acción "reivindicativa de recuperación dun patrimonio público que foi usurpado pola familia Franco".
"BO ESTADO DE MANTEMENTO"
Ademais das que están en posesión da familia do ditador, as outras sete representan ao Rei David, ao Rei Salomón, a outro monarca bíblico, aos profetas Xeremías, Isaac, Ezequiel, Enoc, Elías, Fernando II de León e Malaquías, a estatua de Santiago 'Miles Christi' e unha última peza descrita de forma xenérica como "cabeza de estatua e columna".
A Consellería indicou que na actualidade atópanse nun "bo estado de mantemento xeral" após a restauración á que se someteron para unha exposición monográfica sobre o Mestre Mateo no Museo do Prado de Madrid.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.