Por Galicia Confidencial | Lugo | 11/02/2018 | Actualizada ás 10:00
A Rede Galega de Apoio ás Persoas Refuxidas denuncia a situación de desamparo total á que se enfrontan neste momento as dúas familias de orixe sirio que chegaron a Lugo e Sarria no verán de 2016, incapaces de facer fronte ao pago dos alugueres dos pisos nos que se atopan e sen ningún tipo de axuda ou recurso para subsistir, unha vez rematado o programa de reasentamento e reubicación levado a cabo polo Ministerio de Emprego (MEYSS).
O prezo dos pisos nos que foron emprazadas ascende a 280 e 300 euros mensuais respectivamente, un gasto cuberto ata xaneiro por Cruz Vermella como parte do programa de acollida, pero que agora deben asumir as familias, o cal, aseguran dende a Rede Galega de Apoio ás Peroas Refuxiadas, "é imposible para elas", que "mesmo dependen doutras organizacións como Cáritas ou axudas de particulares para a súa alimentación e vestimenta".
Malia ter formado parte do plan de acollida do MEYSS para o traslado de solicitantes de asilo provenientes de campos de refuxiados de Grecia, Italia ou, como é no caso destas familias, do Líbano, a súa situación é practicamente igual a cando chegaron, alerta a Rede.
"Non tiveron acceso á realización de ningún curso de formación, non contan con toda a súa documentación e tampouco adquiriron unha titulación que acredite o seu coñecemento da lingua nin clases formais, máis alá das impartidas por voluntariado de Cruz Vermella e que son insuficientes para desenvolverse no seu día a día ou para optar a un traballo", expón a Rede Galega de Apoio ás Peroas Refuxiadas.
No caso da familia que se atopa en Lugo, teñen unha filla de dez anos cunha importante diversidade funcional. Precisamente, debido a esta condición, a familia debería poder ter dereito a unha axuda económica de dependencia, pero a solicitude aínda se está tramitando e pode tardar varios meses en chegar, polo que podería ser tarde para cando se lle concedes.
NON BUSCAN CARIDADE
Ambas familias insisten en que non buscan caridade, senón a posibilidade de traballar para así sacar adiante os seus fillos e integrarse por completo nas vilas, nas que aseguran estar moi contentas e ser moi ben recibidas.
Dende a Rede Galega de Apoio ás Persoas Refuxiadas lamentan que os programas de integración deseñados polo Goberno Español estean "máis dirixidos a cumprir co mandato da Unión Europea que a realizar un verdadeiro plan de integración para estas persoas que veñen fuxindo dunha guerra e que chegan a un país novo no que non contan con redes de apoio ou familia e do que descoñecen ata a lingua".
A Rede fai, ademais, un chamamento directo á Xunta de Galicia para que "tome cartas de xeito urxente no asunto e asuma a súa responsabilidade".
"Non podemos entender a impasibilidade das Asministracións Públicas ante estes casos, España incumpriu escandalosamente coas cotas esixidas pola Unión Europea en materia de acollida, polo que cremos é imprescindible que, alomenos aqueles casos que foron aceptados, reciban a atención necesaria ata a súa integración efectiva e que se atendan as súas necesidades caso por caso e non aplicando un programa tipo", argúen dende a Rede Galega de Apoio ás Persoas Refuxiadas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.