Por Galicia Confidencial | Vigo | 14/02/2018 | Actualizada ás 22:00
Vigo, Alacante, Las Palmas, Murcia, Santa Cruz de Tenerife e Valladolid conforman o grupo de urbes ineficientes en España, entre as grandes cidades e capitais do Estado. Isto é, son cidades non sustentables, onde a calidade de vida se ve minguada polas condicións socioeconómicas e medioambientais. Así o expón un estudo realizado por investigadores do Departamento Enxeñaria Quimica da Universidade de Santiago (USC).
Os autores do estudo combinaron tres metodoloxías distintas aplicadas a unha mostra de 26 cidades de toda España representativas e con diferentes características de poboación, localización, demandas, economía, topografía e cultura. Esas cidades son: A Coruña, Alacante, Badaxoz, Barcelona, Bilbao, Córdoba, Xixón, L'Hospitalet de Llobregat, As Palmas, Logroño, Madrid, Málaga, Murcia, Oviedo, Palma de Mallorca, Pamplona, Santa Cruz de Tenerife, Santander, Santiago de Compostela, Sevilla, Toledo, Valencia, Valladolid, Vigo e Zaragoza
Os investigadores elaboraron un modelo de Análise Envolvente de Datos para determinar a eficiencia das cidades, avaliando os indicadores dos tres alicerces da sustentabilidade: económico, social e medioambiental.
Os resultados da análise identificaron 20 cidades eficientes e seis cidades ineficientes con valores por debaixo do limiar marcado (100%), cunha puntuación de eficiencia entre 57,9% (Alacante) e 85,8% (Vigo).
Mentres Vigo se sitúa entre as cidades non sustentables desta mostra —con todo, é a mellor posicionada destas—, A Coruña e Santiago de Compostela intégranse no grupo de urbes eficaces, segundo os datos do estudo, que inclúe estas tres urbes galegas entre as 26 analizadas.
Os investigadores da Universidade de Santiago propoñen a metodoloxía aplicada no seu estudo —cun enfoque integrado e multicriterio— como unha vía fiable para medir a eficacia ou ineficacia das cidades considerando parámetros tales como a proporción de persoas en risco de pobreza e exclusión social, a taxa de desemprego, a proporción de criminoloxía, os espazos educativos, o nivel de educación, o ingreso neto medio, e indicadores mediombientais como consumo de electricidade e auga, lixo xerado, emisións de CO2, reciclaxe, etc.
Os resultados do estudo, asinado por Sara González García, Rocío Manteiga, María Teresa Moreira e Gumersindo Feijoo, publícanse na revista científica Journal of Cleaner Production, nun artigo titulado 'Assessing the sustainability of Spanish cities considering environmental and socio-economic indicators'.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.