O Goberno de Rajoy négase a traspasar a Galicia a AP-9, unha das autoestradas máis caras do Estado
Audasa gañou en 2015, case 140 millons polas peaxes. En Marea define ao Goberno central e á concesionaria como o "tándem do espolio" e o BNG asegura que esta nova negativa do Executivo central é a “enésima tomadura de pelo” aos galegos.
- En Marea, sobre o veto do ministro de Fomento ao traspaso da AP-9: "Estamos gobernados por trileiros e mentireiros"
- O BNG cre que o veto á AP-9 faise coa "complicidade" de Feijóo e urxe que se reúna a comisión bilateral
- Canto gaña Audasa, a concesionaria da AP-9 que seguirá aumentando as peaxes ata 2048?
- Que grupos e entramados empresariais están detrás das autoestradas galegas
- O PSdeG cre que o bloqueo á transferencia da AP-9 revela o "fracaso" de Feijóo na defensa de Galicia
Por Galicia Confidencial | Madrid / Compostela | 14/02/2018 | Actualizada ás 14:11
A AP-9 é unha das autoestradas máis caras o Estado e o seu prezo segue aumentando ano tras ano. En 2012 caducaba a súa concesión e tería que ser pública, pero entón goberno popular de José María Aznar, concedeulle a Audasa, a concesionaria desta infraestrutura, unha nova prórroga ata o 2048.
E, novamente, outro goberno do PP, desta volta con Mariano Rajoy ao fronte, négase a traspasar unha vía que xenera cuantiosos beneficios, tal e como xa publicou o GC. Segundo o informe que Audasa remitiu á Comisión Nacional del Mercado de Valores (CNMV) en 2016, os ingresos eran de 138,6 millóns, un 3,3% máis que en 2015, dos que 88 millóns foron directamente ao beneficio de explotación. Así, de cada cen euros que a compañía ingresa por peaxes, uns 64 euros son ganancias, sen contar custos financeiros nin amortizacións.
INTERESES
Audasa pertence ao grupo Itínere, que ten sete concesións de autopistas que suman un total de 612 km, sendo máis da metade deles en Galicia e sendo Autopistas del Atlántico, unha das que máis beneficios lle reporta. Tamén está vinculado ao grupo Sacyr tal e como xa publicou este medio.
Desta volta, foi o ministro de Fomento, Íñigo de la Serna quen vetou o tramite unha iniciativa do Parlamento galego para traspasar á Xunta a titularidade da autoestrada AP-9 asegurando que non se incorre nunha "discriminación" cara a esta comunidade e recalcando que o Executivo impediu o debate da iniciativa porque suporía un incremento orzamentario de 4.000 millóns de euros.
Foi a resposta que de la Serna lle deu á deputada de En Marea Alexandra Fernández, que acusou ao Goberno español de formar xunto á concesionaria Audasa un "tándem do espolio" e acusou ao PP de facerlle o "traballo sucio" e "blanquear os intereses" de Audasa. Ademais, criticou ao Goberno por "cargarse" o principio de autonomía do Parlamento de Galicia, "coa complicidade" do presidente da Xunta, Alberto Núñez Feijóo.
NOVAMENTE, A CONSTITUCIÓN
Pola súa banda, de la Serna volveu a esgrimir a Constitución para defender a “constitucionalidade” de vetar este traspaso que piden todos os partidos galegos porque. E aproveitou para criticar a “solvencia económica” da Xunta, a pesar de que é diso do que presume Feijóo, ao suliñar que para ese traspaso ten que haber unha "garantía" de que é "viable" desde o punto de vista orzamentario e non contravir a Constitución nin o regulamento da Cámara.
O pasado ano, os grupos con representación no Parlamento galego, PPdeG, En Marea, PSdeG e BNG, aprobaron por unanimidade unha proposición de lei para debater no Congreso a transferencia da AP-9, ante o cal o Goberno exerceu a súa capacidade de veto.
“TRILEIROS E MENTIREIROS”
Esta nova negativa tamén provocou as críticas dos partidos da oposición en Galicia. Así, o viceportavoz de En Marea no Parlamento galego, Antón Sánchez, lamentou estar "gobernados por trileiros e mentireiros" e dixo que é "totalmente falso" un dos argumentos que utilizou o ministro ao aludir a un custo do rescate valorado nuns 4.000 millóns de euros.
Ao seu xuízo, "volveu faltar ao respecto aos galegos" na súa resposta á deputada por En Marea na Cámara Baixa Alexandra Fernández, posto que a última proposición de lei que enviou a Cámara autonómica ao Congreso para debater esta transferencia foi elaborada polos letrados do Parlamento de Galicia e "non falaba de rescate". Fronte a esta "mentira descarada", o viceportavoz de En Marea denunciou que os membros do Goberno de Mariano Rajoy "traballan para a empresa", en relación á concesionaria da AP-9, que é Audasa.
Tamén a portavoz nacional do BNG, Ana Pontón, considerou que o veto do ministro faise "coa complicidade" do presidente da Xunta, Alberto Núñez Feijóo. En rolda de prensa, Pontón censurou a "enésima tomadura de pelo aos galegos" e preguntouse se Feijóo "ten pensado facer algo ou xustificar unha situación" que, ao seu xuízo, significa que os galegos "sigan pagando unha estafa xeneralizada".
A dirixente nacionalista manifestou que se "ten que reunir con urxencia a comisión bilateral" na que están representados o Ministerio de Fomento e a Consellería de Infraestruturas e débese explicar, engadiu, por que se inaugurou unha obra cando segue habendo traballos pendentes.
- En Marea, sobre o veto do ministro de Fomento ao traspaso da AP-9: "Estamos gobernados por trileiros e mentireiros"
- O BNG cre que o veto á AP-9 faise coa "complicidade" de Feijóo e urxe que se reúna a comisión bilateral
- Canto gaña Audasa, a concesionaria da AP-9 que seguirá aumentando as peaxes ata 2048?
- Que grupos e entramados empresariais están detrás das autoestradas galegas
- O PSdeG cre que o bloqueo á transferencia da AP-9 revela o "fracaso" de Feijóo na defensa de Galicia
