O PPdeG tamén rompe a tregua con Ciudadanos: “Só queren buscar réditos electorais”

Alberto Núñez Feijóo e o seu partido en Galicia decidiu romper a ambigüidade das últimas semanas con respecto a Ciudadanos logo da ofensiva iniciada por Rajoy en Madrid. O presidente galego pasou de recoñecer a valía de Rivera e de Arrimadas a cargar contra a súa formación a que acusa de tentar facer “electoralismo”.

“Están máis preocupados de buscar réditos electorais que de garantir a gobernabilidade de España”, espetou este xoves Feijóo na rolda de prensa posterior ao Consello da Xunta. Foi a resposta que lle deu a unha xornalista de La Sexta que lle preguntou directamente por como ve, agora, a relación entre Ciudadanos e o PP.

Logo da vitoria de C's nas eleccións de Cataluña, moitos dirixentes do PP criticaron duramente o oportunismo político da formación de Rivera, pero Feijóo foi un dos poucos que chamou a facer autocrítica e recoñeceu a valía dos seus dirixentes. Non obstante, esta postura semella que mudou radicalmente, especialmente, logo dos encontronazos que Ciudadanos e populares tiveron en Madrid.

Por iso, o presidente galego acusou a este partido de “electoralista” e de impedir aprobar os orzamentos xerais do Estado por intereses “políticos”. “Non é razonable que tenten condicionar un acordo ao apoio que pode dar o PNV”, dixo. “Se Ciudadanos non quere apoiar ao PP é que non quere que se aproben os PGE”, dixo. “O que están buscando é disculpas pero, así, van saír todos perdendo”, concluíu.