Os funcionarios da Xunta, contra a represión da liberdade de expresión no Estado español

A Xunta de persoal dos Servizos Centrais da Xunta de Galicia vén de emitir un comunicado "a favor da liberdade de expresión e mobilización", como resposta ao "recrudecimento da persecución pola vía penal de certos actos que recordan a outro tempo", din. O texto foi aprobado por ampla maioría, co único voto en contra dos dous representantes do CSIF.

Protestas de profesionais sanitarios no Álvaro Cunqueiro pola falla de liberdade de expresión | Fonte: CIG

Os funcionarios recordan que "no Estado español existe un dos códigos penais máis duros da Unión Europea e dos que se utiliza para reprimir a liberdade de expresión, mobilizacións e
organización política, como sufrimos a diario". Porén, "non se emprega tanto para perseguir a corrupción", contrapoñen.

A propia Xunta de Persoal asegura ter visto como "recruou a atitude da Xunta nas últimas mobilizacións", nas que os este órgano de representación foi "de malos modos convidado a abandonar as protestas no seu centro de traballo".

No comunicado feito público este venres, os funcionarios amosan a súa "preocupación polo crecente deterioro dos dereitos fundamentais e criminalización das opinións, manifestacións ou accións políticas". Así, lembran casos de "encarceramento de twitteros/as, titiriteiros, representantes públicos... todo, con dúbidas máis que razoables sobre os fundamentos de dereito aplicados", expoñen.

"Son moitas as condenas e críticas desde diferentes organismos e organizacións tanto de dentro como de fóra do Estado español a esta deriva de perda de calidades democráticas", recordan.

Os funcionarios consideran que esta é "unha deriva cara tempos pasados, onde as tensións sociais se resolven pola vía do código penal, un dos máis estritos de Europa", insisten.

Por último, expresan o seu apoio ás "persoas que sofren a represión do Estado polo libre exercicio dos seus dereitos máis elementais".