Por Galicia Confidencial | Santiago de Compostela | 17/02/2018 | Actualizada ás 12:45
O interese do xigante da pasta de papel por instalarse en Galicia e explotar aquí plantacións de eucalipto non é novo. En agosto de 2017 dábase a coñecer que The Navigator Company (anteriormente coñecida como Grupo Portucel Soporcel) quería instalarse en Galicia e adquirir grandes plantacións para nutrir as súas industrias portuguesas, ante o veto das autoridades lusas ao eucalipto, logo dos devastadores incendios que sufriu este país.
Agora, Faro de Vigo decidiu retomar e publicar en pechado (só para os seus subscritores) este tema, que xerou gran polémica en Galicia os pasados meses. Segundo o xornal vigués, a compañía lusa está agora interesada en activar un proxecto propio de silvicultura no noso país.
A reforma portuguesa da lei forestal recolle a prohibición de plantacións de eucalipto até o ano 2030 e só outorgará permisos en casos de "transplantes de áreas que están ecoloxicamente mal localizadas e que non son economicamente rendibles".
Estas restricións levaron ao gran xigante portugués da pasta de papel, The Navigator Company, a "ollar para outras fontes de floresta e de madeira fóra de Portugal, diferentes das que hoxe utiliza”. "E unha base forte está en Galicia”, indicaran fontes da empresa.
POLÉMICA
Os plans da empresa portuguesa xeraron gran polémica e preocupación en Galicia, tamén azoutada polos incendios forestais e por un tenso debate público sobre as explotacións de eucalipto no noso país e as políticas forestais da Xunta.
A aprobación da modificación da normativa que regula a realización de cortas de madeira por parte da Consellaría de Medio Rural provocou grandes críticas entre diferentes sectores. Por exemplo, a Asemblea contra a Eucaliptización denunciou que a Xunta acelerou os permisos de cortas de eucaliptos para favorecer a multinacionais, nomeadamente, The Navigator Company.
Neste sentido, criticou que se teña renunciado á diversificación forestal, produtiva e industrial, para apoiar a especialización a través da expansión da celulosa e o eucalipto, "a costa das nosas paisaxes e da nosa economía". Por iso, denunciou que a nova normativa de Medio Rural "será unha patente de corso para seguir coa eucaliptización na maioría do territorio".
Tamén o BNG alertou do interese da pasteira lusa de investir en Galicia para mercar plantacións de eucaliptos como medio de eludir as limitación para a plantación de eucalipto no país veciño. Así, os nacionalistas denunciaron que esta situación “agudizaría a eucaliptización do monte galego”, que xa acumula 230.000 hectáreas máis das previstas no actual plan forestal da Xunta ata 2032.
“A nova regulación portuguesa para controlar e reducir o eucalipto é unha ameaza á esperanza de Galiza para optar por un monte racional, diversificado, multifuncional e sostible”, advertiu o portavoz parlamentario de Agricultura, Xosé Luís Rivas, que ve no interese da pasteira lusa “unha ameazada engadida que pode converter o noso monte nunha explotación económica propia do século XIX de tintes coloniais”.
O certo é que de concretarse e realizarse os plans de The Navigator Company para asentarse en Galicia e explotar plantacións de eucalipto no noso territorio, abriríase a veda no noso país para as multinacionais pasteiras.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.