Por Galicia Confidencial | Ferrol | 20/02/2018 | Actualizada ás 08:30
As 135.000 toneladas de residuo asfáltico depositadas nun monte de Cabanas, están neste concello desde o ano 2009. Os refugallos procedían do porto holandés de Rotterdam e a empresa importadora, Holding Transmediterráneo de Construcciones SL (HTC) depositounos nos terreos agora afectados. No ano 2017 o Xulgado do Penal nº 2 de Ferrol pronunciárase confirmando a existencia dun delicto ecolóxico e daba a orde de retirar calquera residuo presente na zona. En vista do incumprimento da sentenza xudicial, a eurodeputada Lidia Senra presentou por segunda vez unha pregunta á Comisión Europea (CE) sobre estes depósitos contaminantes.
Senra nesta nova interpelación di que a investigación xudicial recolle que se importaron aos peiraos de Ferrol 800.000Tn de residuos asfálticos procedentes de Holanda. Medio millón de toneladas destes restos asfálticos foron vendidos e empregados en obras de administracións públicas e privadas en Galicia, sen que ninguén informara sobre o cumprimento da directiva para asegurar a descontaminación das superficies contaminadas. Na acutalidade no porto de Ferrol hai unha cantidade de 157.500 toneladas destes refugallos.
Dada a gravidade desta situación e a finalización do proceso xudicial en marcha, a eurodeputada demanda á CE a pertinencia de que considere iniciar una investigación sobre a posíbel infracción do establecido pola normativa comunitaria relativa á xestión de residuos, así como de levar adiante investigacións que clarifiquen en que condicións reais está a ter lugar o tratamento, transporte e depósito de residuos tóxicos entre os Estados membros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.