Por Galicia Confidencial | Vigo | 28/02/2018 | Actualizada ás 13:08
SES presenta o vindeiro 9 de marzo en Vigo o seu novo disco, ‘Readmirando a condición’ logo de esgotar entradas en dous concertos consecutivos na Coruña no inicio de xira e tamén en Barcelona (1 de marzo). A nova cita será no Auditorio Mar de Vigo ás 21 horas. As entradas xa están á venda en ticketea.com.
Neste novo traballo, publicado o pasado 1 de decembro, a artista galega volveu gravar, musicar e arranxar o seu primeiro disco, ‘Admirando a condición’, que publicou en 2011, ademais dun tema inédito e homónimo.
XIRA
O espectáculo de Vigo forma parte da xira que levará a SES nos vindeiros meses por varias cidades galegas: Vilagarcía o 7 de abril; Compostela o 14; Narón o 12 de maio; e Lugo o 26, ademais de Barcelona (Tradicionàrius, 1 de marzo), Madrid (Galileo Galilei, 13 de marzo), Bilbao (Azkena, 20 de abril) e Lizarra ao día seguinte.
Nesta xira os fans poderán escoitar por primeira vez o repertorio íntegro deste disco, pois naquel momento non se fixo xira e algúns dos temas que inclúe -como “Rolling Stone”, “Pepa” ou “Fala de mel”- apenas foron interpretados en directo.
Esta revisión do seu primeiro disco chega logo do éxito de ‘Opoñerse á extinción’, do que vendeu máis de 7.000 discos (chegou ao top 85 de vendas en España) e de ofrecer uns 50 concertos desde a súa presentación en decembro de 2016, con todo o papel vendido en case todos os auditorios galegos e concertos nas principais salas de Bilbao, Madrid ou Barcelona, alén de participar no Madrid World Pride e noutros moitos festivais por toda a Península.
‘Readmirando a condición’ está composto por doce temas, dos cales once corresponden ao seu primeiro álbum, que contiña éxitos como “Tempestades de sal” ou “Non son fada”. Desta volta, a artista dálle un son máis persoal ao seu disco de debut, cunha sonoridade máis potente. Estas once cancións foron gravadas desde cero e producidas e arranxadas por ela mesma mesma, a diferenza do primeiro disco. O novo disco só se vende nos concertos da banda e no seu sitio web.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.