Por E.P. | SANTIAGO DE COMPOSTELA | 03/03/2018 | Actualizada ás 15:26
Anova fixo un chamamento este sábado a participar na folga feminista convocada para o próximo 8 de marzo, Día Internacional da Muller Traballadora, e cargou contra a "posición reaccionaria" do Partido Popular ante a igualdade.Despois da reunión da coordinadora, o líder da formación fundada por Xosé Manuel Beiras, Antón Sánchez, censurou que o PP estea en contra de todos os movementos que "historicamente" supuxeron "avances sociais" alcanzados despois de que a xente "saíse á rúa".
"Iso é o que pretenden facer as mulleres este 8 de marzo, que é gañarse os dereitos e, ante iso, o PP está onde estivo sempre, nunha posición reaccionaria", manifestou nunha comparecencia ante os medios na que estivo acompañado polos militantes Valeria Vázquez e Iván Rodríguez.
Nesta liña, Valeria Vázquez animou a participar na folga do próximo xoves "convocada en catro eixos: laboral, estudantil, de coidados e de consumo". "É fundamental a participación das mulleres porque sen nós non se move o mundo", sinalou.
E é que, tal e como indicou, esta mobilización será "un paso máis" no proceso de acumulación de forzas. "Non é un fin en si mesmo senón que debe ser un punto de inflexión", apuntou.
APOIO A EMILIO CAO
Anova tamén aproveitou a súa cita deste sábado para volver mostrar o seu apoio a Emilio Cao, un mozo de 22 anos veciño do Carballiño que foi detido nas Marchas da Dignidade de 2014 para o que piden cinco anos e oito meses de prisión por desordes públicas e atentado á autoridade.
Despois de reiterar respaldo ao novo, o militante de Anova Iván Rodríguez lamentou os Gobernos do PP só respondan as demandas sociais a través da "represión". "Como moitos de nós, Emilio Cao é parte dunha xeración que non coñecemos máis que crise, que precariedade, paro e emigración", manifestou para censurar que, "en lugar de canalizar estas demandas", o PP "responda con represión".
PLENARIO
Por último, preguntado polo próximo plenario que En Marea prevé celebrar o 17 de marzo, Antón Sánchez explicou que esta cita aínda non foi abordada pola coordinadora da súa formación e sinalou que é un evento "ordinario" que se celebra "cada seis meses".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.