A Xunta inicia os trámites para declarar BIC o Museo Carlos Maside

A Consellería de Cultura, Educación e Ordenación Universitaria iniciou os estudos previos necesarios para proceder á incoación da declaración como ben de interese cultural (BIC) do Museo Carlos Maside, situado no complexo industrial de Cerámicas do Castro, en Sada.

Esta decisión supón un paso máis na protección dun inmoble que, concibido polos intelectuais galeguistas Luís Seoane e Isaac Díaz Pardo en 1970, alberga no seu interior importantes obras de autores como Castelao, Laxeiro ou Lugrís.

Foi o Concello de Sada o que deu a coñecer este sábado a decisión da Xunta. Así, nun comunicado, a administración local explica que o propio secretario xeral de Cultura, Anxo Lorenzo, informou desta cuestión ao alcalde da localidade, Benito Portela. Ademais, sinala que o anuncio que agora se realiza para o Carlos Maside prodúcese "despois de dous anos de traballo na procura da distinción BIC para o complexo do Castro".

Para iniciar as actuacións necesarias, a Dirección Xeral do Patrimonio Cultural procederá a valorar a situación actual do contido do museo e analizará as necesidades arquitectónicas e de conservación do edificio a través de visitas técnicas. Posteriormente, unha vez conseguidos os informes, procederán a convocar unha reunión coas partes implicadas para avanzar no desenvolvemento do proxecto, precisou o Consistorio.

HISTORIA DO MUSEO

O Museo Carlos Maside viu a luz sete anos despois de que en 1963 Cerámicas do Castro e o Laboratorio de Formas --entidades que posúen cada unha o 50% da propiedade-- asinasen un convenio para a súa creación xunto a Edicións do Castro e outras institucións pensadas para traballar na recuperación da memoria histórica de Galicia e vinculadas ao fundador de Sargadelos, Isaac Díaz Pardo.

Na súa colección permanente exhíbense obras de figuras como Francisco Llorens, Castelao, Francisco Asorey, Xosé Frau, Maside, Bonome, Laxeiro, Arturo Souto, Fernández Mazas, Cabreiro, Huici, Citino e Maruja Mallo, Lugrís, Seoane, Colombo, Eugenio Granell e o escultor Antonio López, entre outros.

Pero a singularidade do Maside non reside só no seu contido. Así, o edificio, proxectado por Andrés Fernández-Albalat, componse de varios volumes de forma hexagonal e diferentes alturas que, unidos, forman un orixinal conxunto. Ademais, cada unha consta dunha cubrición piramidal e os lados de cada figura están pintados cun gran colorido.

PETICIÓN BIC

A pesar da importancia do patrimonio que garda, o museo permaneceu pechado ao público varios anos e co seu contido en risco de degradarse até a súa reapertura a finais de 2017.

Precisamente, para mellorar a situación que atravesaba este inmoble, o Concello de Sada aprobou en decembro de 2015 solicitar á Xunta a declaración como BIC das complexo Cerámicas do Castro, unha figura de protección que incluiría, ademais da propia fábrica, ao Museo Carlos Maside, ao Laboratorio de Formas de Galicia e o taller do intelectual Isaac Díaz Pardo, incluíndo as coleccións e bibliotecas neles contidos.

Deste xeito, ante a decisión da Xunta de iniciar os trámites para avanzar na protección do museo, o alcalde de Sada, Benito Portela, mostrouse "satisfeito" polo traballo levado a cabo polo goberno local para "pór en valor tanto o edificio de Cerámicas do Castro como o valor artístico e histórico que atesoura".