A loita pola igualdade e o non sexismo chega á literatura infantil
Convócase o primeiro premio de literatura infantil pola igualdade que ten como obxectivo promover a educación en igualdade.
Por Galicia Confidencial | Vigo | 09/03/2018 | Actualizada ás 10:17
A igualdade e o non sexismo tamén chega á literatura infantil. De feito, co motivo da celebración do 8 de marzo, e para promover a educación en igualdade e como homenaxe a todas as persoas que fixeron a aposta de escribir literatura infantil non sexista, Baía Edicións convocou o I Premio Fina Casalderrey de literatura infantil pola igualdade.
A proposta deste premio, que dotará con 5.000 € á obra gañadora, “é unha chamada a participar con obras que atendan ao concepto de literatura infantil non sexista e coeducativa en calquera dos seus aspectos, introducindo elementos críticos que cuestionen o modelo social sexista dominante”, segunda apunta a editorial.
Poderán concorrer ao premio autoras e autores de calquera nacionalidade que presenten os orixinais escritos en lingua galega conforme á normativa vixente. Ademais, as obras a concurso deben ser orixinais, inéditas e non premiadas. O feito de participar implica o compromiso de non optar a outros premios coas mesmas obras mentres non se resolva este, compromiso que se estenderá máis aló da resolución de resultar gañadora.
