A Xunta defende a súa oferta e advirte aos sindicatos da Xustiza: "Non se pode cambiar continuamente de criterio"
Rueda remarca que coa suba que propón o Goberno aos funcionarios e o aumento acordado no Estado cobrarían "un 13% máis".
Por E.P. | SANTIAGO DE COMPOSTELA | 10/03/2018 | Actualizada ás 17:45
O vicepresidente da Xunta, Alfonso Rueda, defendeu a oferta que os negociadores do Goberno deixaron este venres sobre a mesa e que situaría os funcionarios da Xustiza "por enriba da media estatal, tal e como pedían os sindicatos e o acordo parlamentario", dixo.
"Non se pode cambiar continuamente de criterio e, cando se chega ao que se estaba pedindo, elevalo un pouco máis, así non imos chegar nunca a un acordo", lamentou o vicepresidente, nun acto celebrado este sábado, un día despois dunha nova sesión negociadora que volveu terminar sen acordo.
E é que a folga na Xustiza galega continuará, pendente de que a semana que vén volvan sentar Xunta e sindicatos, logo dun encontro no que houbo até tres propostas por parte da Administración galega: a última, 105 euros máis ao mes, de forma lineal para todos os corpos do sector —auxilios, tramitadores e xestores—, un incremento que empezaría a cobrarse parcialmente este 2018, alcanzando o total en tres anos.
Rueda destacou esta suba e incidiu en que, sumada ao incremento acordado no ámbito estatal polo Ministerio de Hacienda, suporía que estes traballadores "pasasen a cobrar un 13 por cento máis".
Na mesma liña, salientou a "vontade negociadora da Xunta" e recalcou que só na última xornada "mellorou tres veces a súa oferta", situándoa "en todos os parámetros que reclamaban os sindicatos, xa que superan a media estatal incluso contando todas as autonomías que non teñen transferida a competencia como un só territorio".
"POR ENRIBA DA MEDIA"
"O acordo parlamentario que eles dicían que era válido, no que se dicía que había que situar por enriba da media a Galicia, con esta proposta queda situada por enriba da media", afirmou o tamén conselleiro de Presidencia, Administracións Públicas e Xustiza, quen remarcou que "o único obstáculo na negociación segue sendo o aspecto económico".
Neste sentido, subliñou que catro dos cinco puntos cos que arrincaron as negociacións "xa están solucionados", incluído o das baixas por incapacidade temporal, no que despois do acordo alcanzado a nivel estatal, a Xunta se comprometeu a aplicalo "na súa versión máis favorable para os traballadores aquí en Galicia".
