Por X.M. Fernández | Castro Caldelas | 15/03/2018 | Actualizada ás 10:34
As potencialidades da Ribeira Sacra como territorio semellan enormes, xa non só de cara ao turismo pola súa excepcional beleza, se non tamén como lugar de oportunidades emprendedoras e territorio para fixar poboación no futuro. E, por iso, acba de saír un videoclip que tenta potenciar a importancia desta rexión.
O director da obra, Fabián Figueroa, recoñeceu terse quedado abraiado pola cantidade de lugares que localizaron para gravar a peza audiovisual e a cantidade deles que tiveron que desbotar por non ter espazo material para incluílos. Confesou tamén que quedou namorado da zona e da Festa dos Fachós, evento cun especial protagonismo no videoclip.
Ademais das intervencións das autoridades, houbo ocasión de escoitar ao actor Rubén Riós, un dos protagonistas da peza audiovisual, á cantante Andrea Pousa e ao Bruxo Queiman que fixo da súa participación no acto unha auténtica “performance”. Coa súa desgarrada e característica voz cargou de mística as súas palabras en relación á Ribeira Sacra e verteu unha copa de viño mencía por enriba da mesa para sorpresa dos persoeiros presentes.
Esta obra audiovisual do grupo de folk fusión Mílson’s, baixo a dirección de Fabián Figueroa e producido pola empresa de espectáculos Queiman e Pousa, trata de poñer en valor as tradicións, o patrimonio, a riqueza paisaxística e a viticultura heroica da Ribeira Sacra pero tamén amosa o tema da emigración. Aínda que saen diferentes localizacións desta zona de forma moi fugaz como o Mosteiro de Santo Estevo, o Mosteiro de San Pedro de Rocas, ladeiras de viñedos ou o canón do Sil, teñen especial protagonismo na peza audiovisual a Festa dos Fachós, o Castelo de Castro Caldelas e o miradoiro de Penas de Matacás.
Participan no videoclip os integrantes de Mílson’s, a cantante Andrea Pousa, o Bruxo Queiman, Rubén Riós (encarna a figura do galego destas terras que emigra para América), veciños e varias agrupacións musicais de Castro Caldelas.
Colaboran na financiación deste proxecto promocional a Deputación de Ourense, a Xunta de Galicia, o Concello de Castro Caldelas, o Consorcio de Turismo da Ribeira Sacra, o Consello Regulador da D.O. Ribeira Sacra, a Adega Ponte da Boga e o Restaurante O Dezaseis de Santiago.
DESTACADOS POLÍTICOS
De feito, no acto que guiou Sara Inés Vega, como anfitrioa e alcaldesa de Castro Caldelas, estiveron presentes moitos dos alcaldes de concellos da Ribeira Sacra, a Delegada da Xunta en Ourense, Marisol Díaz, o Secretario de Política Lingüística, Valentín García, o Presidente do Consorcio da Ribeira Sacra e alcalde do Concello de Sober, Luís Guitián, o Presidente do Consello Regulador da Ribeira Sacra, José Manuel Rodríguez, o Presidente da Deputación de Ourense José Manuel Baltar e o director do videoclip, Fabián Figueroa.
O Presidente da Deputación de Ourense, Manuel Baltar, lembrou que se está a traballar para que a Ribeira Sacra teña o recoñecemento de Patrimonio da Humanidade pero puntualizou que “xa é patrimonio mundial para nós, só falta un distintivo que o acredite pero ninguén negará que estas terras, paraxes e xentes que viviron e viven aquí merecen un recoñecemento especial”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.