Por Galicia Confidencial | Compostela | 15/03/2018 | Actualizada ás 20:32
O presidente da Xunta, Alberto Núñez Feijóo, volveu tentar enfrontar aos funcionarios de xustiza co resto da sociedade, desta volta, cos pensionistas, e acusounos de querer cobrar máis que ninguén cando a situación económica aínda non é boa. "Non podo explicar a un pensionista galego que non temos diñeiro para subir as súas pensións de acordo co incremento do IPC e que si o temos para seguir aumentando ata un 13 por cento o soldo dos empregados públicos de xustiza", asegurou Feijóo, na rolda de prensa posterior ao Consello da Xunta.
Feijóo non o concretou, pero referíase a que a última oferta que a Xunta puxo sobre a mesa aos empregados de xustiza --105 euros máis ao mes para todos os corpos--, que sumada á subida pactada en Madrid para todos os funcionarios situaría o aumento no 13%. Con todo, os funcionarios insisten en que baixaron xa as súas previsións iniciais de 270 euros a 190 euros e que a proposta da Xunta “ten trampa”.
“O meu executivo non pode subir as pensións a todos os galegos e, en consecuencia, non me sinto autorizado para acceder ás demandas dos empregados públicos de xustiza”, insistiu Feijóo ao tempo que volveu criticar a sindicatos e partidos por “politizar” esta cuestión. "Xa se mesturan intereses políticos con intereses sindicais", criticou. Ademais, lamentou que "desde os partidos" se use aos cidadáns "para seguir prolongando un desacordo salarial".
CONCENTRACIÓN
A mesma hora, máis dun centenar de funcionarios de xustiza concentrouse na Coruña nunha nova xornada de folga indefinida baixo a lema 'Non a discriminación na xustiza galega'. En declaracións aos medios de comunicación, o portavoz na Coruña dos sindicatos convocantes da folga, Javier Fernández, lamentou que desde o 9 de marzo non tiveron ningún tipo convocatoria para reunirse coa Xunta de cara a abordar este conflito laboral.
En canto aos 105 euros máis ao mes que a Xunta está disposta a subir aos 2.700 funcionarios de Xustiza en Galicia, Fernández sinalou que non satisfai aos sindicatos, que reclama 190 euros máis ao mes. Unha cantidade "inferior" aos 270 euros que pedían ao comezo das negociacións, asegura. "Baixamos para que Xunta dea un paso adiante e terminar coa discriminación", afirmOu o portavoz dos sindicatos.
NOVA XUNTANZA
Pouco despois destas declaracións, a Xunta convocou aos sindicatos de xustiza a unha nova reunión para o vindeiro luns, día 19 de marzo, co obxectivo de retomar as negociacións que permitan pór fin á folga que os traballadores manteñen desde o pasado día 7 de febreiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.