Por Galicia Confidencial | Compostela | 16/03/2018 | Actualizada ás 12:40
A Xunta está a realizar unha nova normativa sobre a inspección ambiental en Galicia co fin de fomentar a función preventiva. Deste xeito, a nova lei incidirá na necesidade de fomentar a función preventiva no canto de que a inspección ambiental se centre na comprobación das posibles infraccións e como estas poden afectar o ambiente.
Actualmente, en Galicia o marco normativo autonómico vixente está constituído pola Lei 1/1995, do 2 de xaneiro, de protección ambiental da Comunidade Autónoma de Galicia, polo que se regula o exercicio da inspección ambiental única e a tramitación das denuncias ambientais. É dicir, é unha norma con máis de 20 anos de vigor que se atopa desactualizada con respecto á normativa estatal e á normativa comunitaria; así como respecto da actual organización e funcionamento da propia inspeccións ambiental de Galicia.
De feito, actualmente, a normativa comunitaria recolle toda unha serie de obrigas respecto da necesidade de realizar inspeccións ás instalacións sometidas a autorización ambiental integrada e da necesidade de elaborar plans e programas de inspección que comprendan estas instalacións, establecendo previsións específicas tamén respecto ao desenvolvemento das inspeccións a estas instalacións e a documentación xerada nestas, así como a obriga de facer públicos os informes derivados das devanditas inspeccións.
Por iso, a nova normativa tamén se incidirá no labor de concienciación e información que desempeñan os inspectores ambientais, función esencial no cumprimento do obxectivo principal de prever a produción de danos ambientais.
Outra das razóns que xustifican esta actualización da normativa é que non se recollen todas as instalacións que son obxecto de inspección, como son as sometidas a autorización ambiental integrada consonte o disposto no texto refundido da Lei de prevención e control integrados da contaminación, aprobado polo Real decreto lexislativo 1/2016; previsión que resultaba imposible dado que as normas autonómicas son anteriores á normativa comunitaria que deu orixe a este réxime de intervención administrativa.
Nas vindeiras semanas, a Consellería de Medio Ambiente e Ordenación do Territorio iniciará o proceso de consulta pública previa, co fin de compilar a opinión dos suxeitos e das organizacións máis representativas potencialmente regulados pola futura norma con carácter previo á elaboración do anteproxecto de decreto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.