Villares quita ferro ás ausencias no plenario e remarca que "todas as voces valen o mesmo" en En Marea

O portavoz de En Marea, Luís Villares, quitou ferro ás ausencias este sábado no plenario que a formación rupturista celebra en Santiago, onde, entre outros, non participarán os chamados 'alcaldes do cambio'. "Cada un ten as súas prioridades. Todos os votos e todas as voces valen o mesmo para decidir o discurso político", comentou.

Villares atendeu aos medios á súa chegada á Facultade de Económicas onde desde as 10,00 horas deste sábado En Marea celebra un plenario do que sairá a súa postura e grao de implicación nas candidaturas municipalistas para as eleccións do próximo ano.

Un conclave no que non participarán os alcaldes da Coruña, Xulio Ferreiro; Santiago, Martiño Noriega; e Ferrol, Jorge Suárez; quen, no verán de 2016, encabezaron os movementos que derivaron no nacemento de En Marea. "Os impulsores o que dixeron no seu día era que daban un empuxón ao proxecto e o proxecto voaría. O que está a facer hoxe En Marea é voar", asegurou Villares, que engadiu que lle gustaría que no plenario deste sábado "estiveran os 2.500 inscritos" da formación rupturista.

"O positivo é que todo o mundo poida facer achegas. É o grande do espazo de En Marea, que todo o mundo en igualdade de condicións e con horizontalidade pode facer achegas. Aquí é o lugar para facelo", apostilou.

PLENARIO

En Marea afronta este conclave coa intención de definir o seu papel nas municipais de 2019, para as que se ofreceu a prestar apoio loxístico e de coordinación ás candidaturas de unidade popular, así como a explorar unha vía xurídica que sirva de "paraugas instrumental" para aumentar a súa presenza nas deputacións.

As relacións e o traballo dos deputados de En Marea nas Cortes tamén estará no foco, xa que un dos documentos que serán sometidos a debate fai referencia aos parlamentarios de Madrid, aos que a dirección da organización lembra que deben representar "o suxeito político galego".

Segundo a organización, para a cita están rexistradas unhas 200 persoas e contará coa participación de representantes dunhas 80 mareas municipalistas. Ás 11,30 horas, tras aprobar o regulamento do plenario e afrontar o primeiro punto do día, os asistentes gozaron dun receso para poder participar na concentración convocada na Praza de Cervantes polo colectivo de pensionistas.