As temperaturas mínimas seguen en descenso até os -6ºC na Veiga (Ourense)

As temperaturas mínimas seguen en descenso en zonas altas en Galicia e durante a tarde caeron até os -6 graos centígrados no municipio da Veiga (Ourense).

Así, segundo datos de Meteogalicia até as 17,15 horas, recollidos por Europa Press, rexistráronse temperaturas mínimas significativas tamén en Carballeda de Valdeorras (Ourense), -5,9ºC; no municipio ourensán de Manzaneda, con -5,3ºC; e nos lucenses de Cervantes, con -4,8ºC e Pedrafita do Cebreiro, con -4,5º.

Mentres, en localidades con altitude menor aos 900 metros, tamén as mínimas rexistraron valores negativos pero sen experimentar variacións significativas desde o mediodía, con -0,8ºC en Folgoso do Courel (Lugo), -0,4º na Fonsagrada (Lugo) e Monfero (A Coruña) e -0,3º en Samos (Lugo).

Este luns as provincias de Lugo e de Ourense están en risco por neve, que poden deixar acumulacións superiores ao cinco centímetros en 24 horas.