Lida Senra participará na Comisión Xurídica das Mulleres en Nova Iorque
A Comisión da Condición Social e Xurídica das Mulleres (CSW) é un organismo da ONU. As mulleres e nenas das zonas rurais, tema principal na axenda. No Parlamento Europe Senra é a responsábel da transversalización da perspectiva de xénero na Comisión de Agricultura e Desenvolvemento Rural
Por Galicia Confidencial | Santiago | 20/03/2018 | Actualizada ás 17:49
A 62ª Sesión da CSW celebrarase durante toda esta semana na cidade norteamericana de Nova Iorque. O tema centra para este ano serán as mulleres e nenas que habitan nas zonas rurais Lidia Senra foi correlatora o ano pasado dunha resolución do Parlamento Europeo que abordou de xeito específico o papel das mulleres en áreas agrarias.
Sobre a súa participación na delegación do Parlamento Europeo, Senra avanzou a relevancia de situar neste foro tres das cuestións fundamentais para as mulleres que habitan nas zonas rurais: “Protección fronte ás corporacións transnacionais que queren ocupar as nosas terras, e que moitas veces empregan para iso a violencia. Protección fronte á agricultura industrial que destrúe os nosos postos de traballo e contamina os ecosistemas, incluídas as nosas vidas; e recoñecemento legal dos nosos dereitos como labregas, destacando a titularidade compartida e as pensións dignas de xubilación.”
“Considero que é importantísimo poder colocar nestes foros a situación das mulleres e nenas no mundo rural. Isto nos axuda a avanzar na proposta de alternativas para que haxa un verdadeiro recoñecemento dos dereitos das mulleres e das nenas no medio rural.”
A eurodeputada asistirá a unha reunión na que se abordarán estratexias para transversalizar a perspectiva de xénero aos plans de acción humanitaria. A continuación parcticipará no evento “Mulleres Rurais como Axentes de Cambio”, organizado polo Parlamento Europeo. Na quenda de tarde a delegación parlamentaria europea entrevistarase coa embaixadora irlandesa Byrne Nason, Presidenta da Mesa Directiva da CSW; seguidamente con Yannick Glemarec, director executivo adxunto de ONU Mulleres e a continuación intercambiará puntos de vista con parlamentarias cubanas.
