SANTIAGO DE COMPOSTELA | 21/03/2018 | Actualizada ás 19:10 por EUROPA PRESS
Unha delegación da plataforma de vítimas do accidente do tren Alvia reuniuse este mércores con integrantes de PDeCAT, de Cidadáns e de En Marea, após o que mandaron unha mensaxe ao PSOE: "Dan os números" para que sexan os cataláns os que presidan a comisión de investigación sobre o sinistro de Angrois no Congreso dos Deputados.
O portavoz da asociación, Jesús Domínguez, explicou, en declaracións a Europa Press, que o encontro con PDeCAT mantivérono con Carlos Campuzano e Feliu Guillaumes, que se mostraron "dispostos" a que sexa o seu partido o que asuma a presidencia da comisión. "E aínda máis despois da información que lles trasladamos", comentou.
Tamén se viron os afectados do descarrilamento na curva da Grandeira (que se saldou con 80 mortos e 144 feridos) con Fernando Navarro (Cidadáns) e con Miguel Anxo Fernán-Vello e Alexandra Fernández (En Marea, que forma parte do grupo confederal de Unidos Podemos). Todos eles, segundo apuntou Domínguez, trasladáronlles que "lles parece ben" que PDeCAT presida.
Así as cousas, as vítimas din ao PSOE que "os números dan" e que "só falta que digan que si" os socialistas. "A non ser que sexamos moeda de cambio para outras cousas", lamenta o seu portavoz.
Nun contexto de negociacións entre os partidos para decidir quen asume a presidencia de distintas comisións na Cámara baixa, a plataforma pronunciouse publicamente en numerosas ocasións para defender que asumen que presida a comisión calquera partido, "excepto aqueles que votaron en contra", algo que ven "absolutamente lóxico e razoable".
Nas últimas semanas, a última opción que barallaban os partidos maioritarios era Foro Asturias, que, xunto con UPN e o PP, foron os únicos que se opuxeron á comisión de investigación cando saíu adiante a súa creación, fai xa case seis meses.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.