Por Xurxo Salgado | Compostela | 22/03/2018 | Actualizada ás 15:33
“Díxenvos que baixedes dese coche e que deixedes de facer parvadas xa. Como non me fagades caso ídesvos a decatar, ímonos a ver as caras... e desta perdedes a placa e o uniforme". Isto foi o que lle dixo o ex edil concelleiro de Ferrol e hoxe secretario xeral do PPdeG nesta cidade, Guillermo Evia, a dous policías hai cinco anos tal e como recolleu unha denuncia do sindicato CSIF que acusou a este concelleiro de ameazar aos axentes por tentar multar un veículo.
“Nin coñezo as declaracións, vexo que vostede as sabe de memoria, e non me vou pronunciar sobre feitos dos que non teño coñecemento nin directo, nin inderecto”. Foi que respondeu o presidente da Xunta, Alberto Núñez Feijóo, ao ser preguntado por GC sobre este caso, e tamén pola decisión do hoxe delegado da Xunta en Pontevedra, José Manuel Cores Tourís, cando era alcalde de Cambados e abriulle un expediente a un policía que denunciou vexacións por parte do concelleiro de Obras. O edil sería logo condenado con 500 euros por un xulgado.
Previamente Feijóo criticara duramente á deputada de Podemos, Paula Quinteiro, por dirixirse a uns policías locais de Santiago a pasada fin de semana dicindo “ti non sabes con quen estás falando”.”Iso era do século pasado. É impropio de calquera cargo público e menos de quen di representar aos e ás galegas. Ás institucións se vai a servir e servir é sinónimo de humildade e a humildade é absolutamente incompatible coa prepotencia. E a prepotencia coa que se tratou á policía Local e á policía Nacional é impropia de calquera membro da Cámara de calquera sistema democrático”, suliñaba o presidente ao ser preguntado pola deputada de En Marea.
“Entón tamén considera que esas declaracións que fixeron cargos do PP son impropias e do século pasado?”, preguntoulle despois este medio. “Non podo engadir nada máis do que xa dixen porque non coñezo os casos”, insistiu Feijóo. “O que si digo é que é que xa lle dixen a súa compañeira e que é aplicable a calquera caso similar”, engadiu.
SOBRE DIMISIÓNS
Antes, o presidente da Xunta despacharase a gusto coa parlamentaria de En Marea, aínda que, a diferencia doutros dirixentes do seu partido, non quixo pedir a súa dimisión. “Todo o mundo ten dereito a pensar o que vai a facer. E deixeme saber a súa resposta. Pero o que é evidente é que nin sequera vin desculpas, só botar balóns fóra”, apuntaba cando era preguntado ao respecto. En todo caso, insistiu en que esa actitude “é impropia de calquera persoa, e menos dunha que representa ás demais, dun membro da Cámara galega”.
“Que se vai facer a partir de aí?. Hai que darlle tempo a que tomen as súas propias decisións. Onte pregunteille ao seu portavoz e non tiven reposta. Está no seu dereito porque o importante non son as respostas, senón as decisións e non sabemos que decisións van tomar e hai que ser respetuosos porque están en periodo de maduración desa decisión e veremos o que deciden finalmente”, concluíu.
BEIRAS
Pola súa banda, o histórico dirixente Xosé Manuel Beiras manifestou, nunha entrevista na Radio Galega, que a deputada de Podemos debería dimitir, mentres, a tamén deputada Eva Solla saíu na defensa de Quinteiro. A Coordinadora de En Marea, que lidera Luís Villares, convocou para este venres unha reunión do Consello das Mareas para votar unha petición de dimisión da parlamentaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.