PSdeG considera insultante a promoción da subdirectora de Farmacia

Os socialistas galegos consideran un "insulto" ás vítimas a oferta do Ministerio de Sanidade á até agora subdirectora xeral de Farmacia do Sergas, Carolina González-Criado. A subdirectora está investigada por homicidio imprudente na causa da Hepatite C, quen deixa a Administración autonómica por mor dunha oferta do departamento de Dolors Monserrat para participar nun estudo da área farmacéutica. Fronte a iso o PPdeG destacou a súa "valía".

"Parece ser que agora está chamada a unha responsabilidade no Ministerio de Sanidade. Por tanto, se cumpre os requisitos para ocupar esa praza, a nós parécenos ben", afirmou o secretario xeral do PPdeG, Miguel Tellado, en declaracións aos medios. Por iso, agradeceu a González-Criado "o servizo prestado" e afirmou que no Servizo Galego de Saúde (Sergas) "demostrou a súa valía" os últimos anos. "Ten acreditado ser unha profesional de primeira liña", apostilou Tellado.

Preguntado sobre se debería esperar á resolución da causa na que está investigada que instrúe o Xulgado de Instrución Número 3 de Santiago, Tellado puntualizou que "son unhas dilixencias previas". "O que existe para todos, tamén para ela, é a presunción de inocencia", aseverou, para sentenciar que "desde logo, que sexa investigada nun sumario, non inhabilita para ocupar esa responsabilidade".

"O seu currículo profesional habilítaa para esa responsabilidade para a que está a ser chamada", considerou o dirixente popular. Tellado reiterou o "respecto absoluto á presunción de inocencia", para lembrar o caso de "unha deputada do PP", María Faraldo, "que dimitiu por un caso e a semana pasada foi arquivado e resultou absolta".

Deste xeito, Tellado rexeitou "xuízos mediáticos" e apelou á "presunción de inocencia". Deste xeito, subliñou que "é unha magnífica profesional" e demostrouno " ao longo do últimos nove anos nas súas responsabilidades no Sergas". "Por tanto, o único que temos que dicir é gratitude polo seu traballo ao longo destes anos", concluíu.

"INSUSTENTABLE"

Pola súa banda, o portavoz de sanidade do Grupo do PSOE no Parlamento galego, Xulio Torrado, insistiu, en declaracións aos medios, nas "incoherencias da Consellería" e considerou "insustentable" que as persoas "imputadas" na causa da Hepatite C, como González-Criado, "sentasen na mesa a avaliar medidas con familiares" das vítimas. "E agora vemos que parece que hai un premio con vontade de que sexa notorio e é un insulto", reprochou o portavoz socialista, quen abundou que "dá a sensación que se fai con toda a vontade de que se vexa, o cal resulta inconcibible".

Neste sentido, apelou a preguntarse "cal é a percepción que teñen os familiares das vítimas". "O ninguneo e o insulto é absolutamente doloroso. Preguntámonos se non hai ninguén na Consellería que teña un pouco de cabeza e sentido común para ver que as cousas teñen que ter certa sustentabilidade desde o punto de vista, mesmo, ético", afirmou. En relación á instrución no marco da que está a ser investigada, Torrado insistiu en que "a actuación da Consellería neste sentido está a ser eticamente reprobable". "E consideramos que é un insulto o que está a ocorrer", concluíu.