Ramón Villares ve "lamentable" que Galicia marxine a cultura na súa estratexia de acción exterior

O presidente do Consello da Cultura Galega, Ramón Villares, censurou que a cultura estea marxinada na "estratexia de acción exterior" de Galicia, xa que cre que, neste ámbito, "só importan os bens industriais e financeiros". Villares criticou "a ausencia" da cultura nas delegacións das institucións galegas noutros países, onde "só van empresarios e directivos" de compañías.

Nesta liña, indicou nunha entrevista este domingo a RNE, que a cultura é "esencial" para a identidade de Galicia, polo que ve "lamentable" que esta quede fóra da estratexia de acción exterior. Ademais, alertou que tamén debe apostarse por integrar a cultura galega "que se fai no exterior" coa que se fai no propio territorio.

Villares referiuse ao informe que o Consello da Cultura Galega presentou hai uns días sobre o estado do ámbito cultural en Galicia, que servirá para trazar a estratexia da Xunta e as institucións nos próximos anos.

Para Ramón Villares, é preciso aumentar "o gasto público consolidado", é dicir, non só o que se realiza desde o Goberno galego, senón o de todas as administracións e institucións da comunidade que destinan fondos á cultura.

COLECTORES CULTURAIS

Deste xeito, remarca que esta aposta pasa por mellorar a "planificación e coordinación" das ofertas culturais para "incentivar o consumo" por parte da cidadanía e non pola construción de "máis colectores".

Así, resaltou que "nos anos de bonanza económica" se produciu "un exceso de creación" de colectores culturais (auditorios, bibliotecas, etc) que non responden as necesidades e ao consumo da poboación galega.

"É coma se tes o 'hardware' dun ordenador pero non tes o 'software': non che serve para nada. A cultura de Galicia necesita depurar o seu 'software'", teorizou Villares.

Así as cousas, cre preciso apostar por "graduar mellor as políticas" culturais para "cambiar os investimentos" e que estas garden relación "entre o que a poboación consome e o que se oferta".

MULLERES

Por outra banda, en canto á presenza das mulleres no ámbito cultural, Ramón Villares mostrouse optimista, xa que opina que "é un camiño que se está cambiando aos poucos", aínda que recoñece que "non todo está logrado".

"O sector da cultura é máis accesible á igualdade de xénero que outros sectores como a enxeñaría ou a construción", sinalou Villares, para logo engadir que "hai unha feminización no sector servizos e no acceso á cultura" pero que isto "non se traduce nos postos de responsabilidade".