O Estado segue marxinando a Galicia; recibe menos fondos que hai 14 anos
O investimento no país segue sendo máis baixo que en 2004, mentres que o Fondo de Compensación Interterritorial (FCI) baixa máis dun 4% e sitúa a Galicia como segunda comunidade con menor incremento.
- Galicia rexistra a segunda maior caída do Fondo de Compensación Interterritorial
- O investimento do Estado en Galicia sobe un 1,3% en 2018 até 936,8 millóns, segunda cifra máis baixa desde 2004
Por Galicia Confidencial | Compostela | 03/04/2018 | Actualizada ás 14:10
O Estado segue marxinando a Galicia no envío de fondos. E tal é o retroceso que os fondos que chegarán ao país volven a rexistros de hai 14 anos. Así, o investimento do Estado en Galicia non chega aos 1.000 millóns de euros de 2004 por segundo ano consecutivo. E aínda que soben con respecto ao pasado ano, quedan en 936,79 millóns de euros, doce millóns máis que orzados en 2017, pero 64 menos que hai 14 anos.
Son os datos do proxecto presentado este martes polo ministro de Facenda e Administracións Públicas, Cristóbal Montoro. De feito, se a comparativa se fai cos 1.363,9 millóns orzados en 2016 para Galicia, o retroceso é de case un terzo, pois en 2018 hai un 31,1% menos.
Deste xeito, Galicia mantense no quinto posto entre comunidades en canto a dotación orzamentaria nos Orzamentos Xerais do Estado (PGE) para 2018, do mesmo xeito que en 2017, aínda que en 2016 ocupaba o terceiro posto. En concreto, recibe o 9,2% do total.
Como no último orzamento aprobado, Andalucía é a autonomía que máis recibe (1.477,75 millóns e o 14,6% do total), seguida por Cataluña, co 13,3 por cento do total, e 1.349,59 millóns de euros. Por detrás de ambas as dúas sitúanse Madrid, que recibe o 12,3 por cento do total (1.247,31 millóns de euros) e Castela e León, co 9,9 por cento e 1.002,14 millóns.
MENOS DIÑEIRO DO FONDO INTERTERRITORIAL
Ademais, Galicia recibirá 42,5 millóns do Fondo de Compensación Interterritorial (FCI) en 2018, un 4,1% menos que en 2017, segundo consta no proxecto de Orzamentos Xerais do Estado (PGE) para este ano rexistrados este martes polo ministro de Facenda, Cristóbal Montoro, no Congreso.
A achega deste fondo cae en cinco comunidades autónomas. Galicia rexistra o segundo maior descenso (-4,1 por cento), que encabeza Comunidade Valenciana (-4,7 por cento). Tamén baixa en Castela e León (-3%), Cantabria (-2,7 por cento) e Rexión de Murcia (-1,0 por cento).
Pola súa banda, o maior aumento rexístrase en Canarias (7,3 por cento), seguida de Castela-A Mancha (2,7 por cento), Asturias (2,6 por cento), Andalucía (0,4 por cento) e Estremadura (0,2 por cento), mentres que en Ceuta e Melilla mantéñense invariables.
