Temas: SANIDADE SERGAS

Convocan mobilizacións en defensa da carreira profesional do persoal do Sergas

CIG-Saúde denuncia que quedará fóra da carreira profesional todo o persoal fixo que se incorporou ao SERGAS nos procesos selectivos convocados a partir de 2012, xa que exixe unha antigüidade mínima de 5 anos como persoal fixo dos cales 3 teñen que ser servizos prestados no SERGAS.

Por Galicia Confidencial | Compostela | 05/04/2018 | Actualizada ás 10:39

Comparte esta noticia

Os profesionais da saúde están chamados a varias mobilizacións os días 5, 12, 19 e 26 de abril en todas as áreas sanitarias galegas, convocados por CIG-Saúde,  para exixir do SERGAS un cambio na negociación da carreira profesional e que esta recoñeza o desempeño do traballo profesional, tal e como foi concibida, e non que se converta nunha penalización retributiva tal e como se establece no documento que presentou a administración sanitaria na Mesa sectorial. 

Persoal do Sergas maniféstase en Santiago de Compostela
Persoal do Sergas maniféstase en Santiago de Compostela

Este sindicato fai un chamamento a todo o persoal a sumarse aos distintos actos de protesta previstos porque “non se pode  consentir unha nova agresión aos nosos dereitos e condicións laborais”. A carreira profesional está recollida na Lei de Ordenación das Profesións sanitarias e no Estatuto Marco do Persoal dos Servizos de Saúde como un recoñecemento progresivo que acada a profesional pola súa preparación, pola súa dedicación, pola innovación e polas responsabilidades e compromisos coa organización adquiridas ao longo da súa vida profesional.

“OBSTÁCULOS”

A secretaria nacional de CIG-Saúde, María Xosé Abuín, denuncia que o SERGAS está a presentar un documento de carreira profesional baseado nunha serie de obstáculos que impiden que o persoal poida progresar nos niveis de carreira e, ademais, agocha cales van ser os valores e contías retributivas destes graos. “Presenta ademais un modelo de carreira que discrimina xa que recoñece este dereito só ao persoal fixo deixando fóra o persoal temporal, cando o Estatuto Marco establece que a carreira profesional é unha retribución complementaria para todo o persoal”, afirma.

Xunto a isto denuncia que tamén quedará fóra da carreira profesional todo o persoal fixo que se incorporou ao SERGAS nos procesos selectivos convocados a partir de 2012, xa que exixe unha antigüidade mínima de 5 anos como persoal fixo dos cales 3 teñen que ser servizos prestados no SERGAS e a incorporación efectiva deste persoal, isto é a toma de posesión da súa praza, non se produciu até o ano 2017. “Este sistema vai ser especialmente lesivo co persoal para o que o SERGAS non convocou proceso selectivo, porque o último foi no 2009 co bipartito. Estamos a falar dos grupos con menores retribucións: celadores, persoal de hostalería ou mantemento, entre outros”.

ANTIGÜIDADE

Tamén impide, segundo a secretaria nacional da CIG-Saúde que o persoal que reúna os requisitos de antigüidade e a súa avaliación sexa positiva poida acceder ao grao de carreira que lle corresponde, permitindo só a incorporación nun réxime extraordinario a un só grao. “Esta incorporación a un só grao é froito do acordo asinado pola administración coas organizacións sindicais que no seu momento romperon a plataforma sindical e se descolgaron da folga que tiñamos convocada conxuntamente”.

A este respecto subliña que CIG-Saúde foi a única organización da mesa sectorial que non asinou este acordo e mantivo a folga do 2 e 3 de novembro de 2017 “por sermos conscientes de que a proposta da administración sobre carreira profesional era lesiva para as traballadoras e traballadores do SERGAS”.

Temas: SANIDADE SERGAS
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta