Por E.P. | Santiago | 05/04/2018 | Actualizada ás 15:14
A Axencia de Información e Control Alimentario (AICA) impuxo un total de 162 sancións a 30 empresas galegas por un importe superior a 164.000 euros. A industria acapara 145 multas, das cales 140 pertencen a compañías lácteas, tres a adegas e dúas no sector oleícola. A AICA realizou desde o inicio da súa actividade fai catro anos un total de 438 inspeccións de oficio en Galicia, das cales o 93% corresponden ao sector lácteo.
En rolda de prensa na Coruña, o director da AICA, José Miguel Herrero, acompañado polo subdelegado do Goberno na Coruña, Jorge Atán, fixo un balance das inspeccións e sancións do último exercicio e deu a coñecer os plans de actuación para 2018. Até 2017, AICA realizou 438 inspeccións de oficio na Comunidade galega, das cales o 93%, 324, foron ao sector lácteo, e o resto aos sectores cárnicos, hortofrutícola e vitivinícola.
INCUMPRIMENTOS EN CONTRATO E PRAZOS
En canto aos motivos máis frecuentes de infracción, Herrero situou a ausencia de contratos e o incumprimento dos prazos de pago entre as industrias lácteas galegas. Así, por non formalizar por escrito os contratos impuxéronse 73 sancións e 57 por incumprir o prazo de pago.
"O sector lácteo en Galicia concentra a metade das sancións impostas neste sector en España", sinalou Herrero, quen avanza que en 2018 a AICA seguirá vixiando o sector lácteo en Galicia ante o alto índice de incidencias.No conxunto de España, AICA fixo 3.669 inspeccións no últimos catro anos, cun total de 922 sancións por un importe de 9,2 millóns de euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.