Por E.P. | PONTEVEDRA | 09/04/2018 | Actualizada ás 10:00
Tres persoas resultaron feridas ao chocar dous turismos no municipio de Marín (Pontevedra) e outra após envorcar o vehículo no que circulaba na Autovía do Salnés ao seu paso polo termo municipal pontevedrés de Sanxenxo.
Segundo informou o 112 Galicia, sobre as 23:15 horas do domingo varios particulares alertaron dun choque entre dous turismos e con posibles atrapados no lugar de Pardavila, na VG 4.4, ao redor do punto quilómetro 8, en Marín.
Após recibir á alerta, persoal do Centro Integrado de Atención ás Emerxencias (CIAE) puxo os feitos en coñecemento do 061 e dos Bombeiros do Morrazo e de Pontevedra. Ademais, informou á Guardia Civil de Tráfico, aos efectivos de Protección Civil da localidade e requiriu a intervención do persoal do servizo de mantemento da estrada.
Despois de chegar ao lugar, os membros do parque comarcal do Morrazo confirmaron ao 112 Galicia que non foi necesario o uso do material de excarceración. Os tres feridos estaban fóra dos vehículos. O 061 desprazou ao lugar unha ambulancia medicalizada e outra asistencial para atender a tres doentes, un deles unha muller de 44 anos que recibiu asistencia no lugar.
Polo seu lado, unha moza de 18 anos foi levada en ambulancia medicalizada ao Hospital Montecelo, e un home de 20 anos na asistencial ao mesmo centro hospitalario, segundo confirmaron a Europa Press as fontes sanitarias.
SINISTRO EN SANXENXO
Por outra banda, na mañá deste luns unha muller foi excarcerada en Sanxenxo após envorcar o seu vehículo na Autovía do Salnés, entre as localidades do Grove e Sanxenxo. Até o lugar desprazáronse, ademais do persoal sanitario, os membros do GES da localidade, que ao chegar ao punto, após recibir o aviso do 112 Galicia, liberaron á muller.
Así mesmo, tamén os Bombeiros de Ribadumia prestaron a súa colaboración nas tarefas de excarceración. Segundo o seu relato, foi necesario retirar unha das portas do turismo para evacuala. Tamén foi requirida a intervención do persoal de mantemento da estrada, que se encargou da limpeza da vía.
En concreto, o accidente ocorreu pasados uns minutos das 7:30 horas deste luns e foi un particular quen informou ao 112 Galicia dun coche envorcado na Autovía do Salnés.O 061 enviou ao lugar unha ambulancia asistencial que levou á muller ferida ao Hospital Domínguez, en Pontevedra.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.