Campaña pola obxección fiscal aos gastos militares
A Oficina de Dereitos Sociais de Coia (ODS-Coia) de Vigo anima aos cidadáns a participar nunha acción a nivel estatal para que cada cidadán desvíe 80 euros da declaración da renda a algunha organización pacifista.
Por Galicia Confidencial | Vigo | 11/04/2018 | Actualizada ás 11:08
Coincidindo coa apertura da campaña da declaración da renda, varios colectivos do Estado —entre estes, a Oficina de Dereitos Sociais de Coia (ODS-Coia) de Vigo— veñen de poñer en marcha unha acción a prol da obxección fiscal para protestar contra os gastos militares. A cantidade que propoñen é de 80 euros a detraer do que se destinaría a gasto mIlitar nos Presupuestos Generales del Estado e destinar eses cartos, con xustificante, a calquera organización que traballe pola paz.
O Centro de Estudos por la Paz J.M. Delàs —observatorio sobre desarme, comercio de armas, conflitos armados e cultura de paz— denunciou que, por primeira vez en dez anos, o gasto militar aumentou un 32% respecto a 2016, incluíndo o pagamento dos PEAS, Programas Especiais de Armamento, que o Goberno non ten en conta á hora de deseñar os orzamentos estatais e que sufraga despois mediante créditos extraordinarios, subliñan os organizadores da campaña.
"Pero o máis grave é que nos próximos seis anos se pretende incrementar o gasto en defensa entre o 50% ou 80%, para achegarse á meta do 2% do PIB en 2024, establecida no cumio de Gales da OTAN e esixida por Estados Unidos", critican os colectivos.
PROCEDEMENTO
Os organizadores da campaña dan unha serie de consellos para poder obxectar fiscalmente. En primeiro lugar, recomendan realizar un ingreso bancario á entidade cara á que se desexa desviar o diñeiro do gasto militar, pola cantidade que se decide obxectar (aconsellan 80 euros, pero pode ser a contía que un desexe) e no asunto da transferencia habería que pór "Obxección Fiscal ao Gasto Militar".
Xa na declaración da renda, no apartado de “Retencións e demais pagos a conta”, hai que empregar un dos subapartados que non se utilicen e engadir a cantidade que se vai obxectar. Por último, recomendan enviar unha carta ao Ministerio de Facenda (postal ou mail certificada ou mediante oficina pública de envíos) anunciando que se fixo a obxección fiscal ao gasto militar e explicando os motivos, con copia do comprobante do ingreso realizado ça organización que se elixiu como destino alternativo.
