A Xunta acusa aos folguista da Xustiza de ser "podemitas"
“O que máis me interesa é que se vexa que están sendo manipulados”, di Feijóo ao tempo que critica aos sindicatos por ir á xuntanza do venres co Goberno galego sen posicións “claras”.
- A Xunta recibe unha convocatoria sindical para volver sentar pola xustiza, pero dubida de que sexa útil outra reunión
- Os funcionarios xa non confían na Xunta e piden ao ministro que medie no conflito da Xustiza galega
Por Xurxo Salgado | Compostela | 12/04/2018 | Actualizada ás 15:04
Máis de dous meses dura xa a folga da Xustiza e lonxe de acercar posicións, traballadores e Xunta alónxanse aínda máis e con graves acusacións. A última foi a do presidente da Xunta que acusou, entre sorrisos, aos folguistas de ter como “referente” a Pablo Iglesias e a Podemos. “Está ben sabelo”, dixo ironicamente.
Na rolda de prensa posterior ao Consello da Xunta, Feijóo criticou a xuntanza que mantiveron representantes dos traballadores en Madrid con formacións políticas, especialmente, con representantes de Podemos. “Agora vese claro a que foron alí... A reunirse con Pablo Iglesias e outros deputados que teñen problemas con vivendas e coa xustiza”, engadiu.
“Isto é moi sorprendente pero o que máis me interesa é que se vexa que os traballadores están sendo manipulados”, engadiu ademais de que o conflicto está “politizado”. Un argumento, o da politización, que o PPdeG e a Xunta mantén xa desde os primeiros momentos da folga.
XUNTANZA DO VENRES
Logo de máis de dúas semanas sen xuntanzas, este venres, sindicatos e Xunta volverán a verse as caras. A Xunta acudirá “só para falar dentro do escenario económico marcado na última oferta”, que insiste que supón unha suba total de 300 euros; 133 euros para os xestores, 108 para os tramitadores e 105 para auxilio. Os sindicatos piden, pola contra, 180 euros lineais para os tres grupos.
A pesar de estar convocado, Feijóo non é nada positivo sobre este encontro. “Non está nada claro o que queren os sindicatos nesta xuntanza”, dixo ao tempo que acusou os representantes dos funiconarios de “non ter respecto polos traballadores”.
