Por Galicia Confidencial | Santiago | 16/04/2018 | Actualizada ás 12:24
aRi[t]mar abrirá a participación do público para escoller as poesías gañadoras de entre as finalistas elixidas xa pola organización. Desta maneira serán os lectores e lectoras quen dean a última palabra para nomear aos ou ás gañadoras. Os e as poetas gañadores, xunto cos músicos xa escollidos, recibirán os premios na Gala de Premios aRi[t]mar Galiza e Portugal 2018.
Este certame da música e da poesía galego-portuguesa é iniciativa da Escola Oficial de Idiomas de Santiago de Compostela. O proceso de votación abrirase despois do xurado ter seleccionado as vinte (10+10) poesías portuguesas e galegas finalistas. As persoas que quixeren participar poderán votar a través da web da Escola Oficial de Idiomas de Santiago de Compostela, desde as 00:00 h do día 20 de abril até ás 23:59 h do día 20 de maio, e participarán posteriormente nun sorteo dun lote de libros.
Os autores e autoras galegas escollidas son Eli Ríos, Fran Alonso, Lois Pérez, Lupe Gómez, Marta Dacosta, Olalla Cociña, Pura Tejelo, Sther F. Carrodeguas, Xulio L. Valcárcel e Xurxo Alonso. E en Portugal saíron finalistas Alexandre Brea, Rosa Oliveira, Claudia R. Sampaio, Madalena de Castro, José Miguel Silva, Rui Almeida, Golgona Anghel, Ana Luísa Amaral, Manuel Afonso Costa e Nuno F. Silva.
aRi[t]mar é un proxecto didáctico e cultural da Escola Oficial de Idiomas de Santiago de Compostela, pertencente à Consellería de Cultura, Educación e Ordenación Universitaria da Xunta de Galiza. O obxectivo de aRi[t]mar é divulgar a música e a poesía galego-portuguesa actuais e achegar a cultura e a lingua dos dous países. Isto desenvólvese dentro do marco da Lei Valentín Paz-Andrade para o aproveitamento do ensino do portugués e vínculos coa lusofonía.
A organizacón faise entre a Equipa de Dinamización da Lingua Galega e os departamentos de galego e de portugués. Durante o ano lectivo trabállanse de forma didáctica os textos e as músicas. Posteriormente escóllense mediante votación popular online as mellores cancións e poesías editadas en Galiza e en Portugal no ano anterior, neste caso en 2017. A finais de outubro os gañadores participarán nunha Gala de entrega de premios en Santiago de Compostela.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.